2026 йил март ойидан бошлаб Etihad Airways авиакомпанияси Абу-Дабидан Тошкентга ҳамда Марказий Осиё ва Кавказорти шаҳарларига парвозларни йўлга қўяди.
Авиакомпания бу қарорни Wizz Air лоукостер компанияси 2025 йил сентябридан минтақага парвозларни тўхтатишини эълон қилганидан сўнг билдирган.
Маълум қилинишича, Etihad Airways ўз тармоғига жами еттита янги йўналишни қўшмоқда: Олмаота (Қозоғистон), Боку (Озарбайжон), Бухарест (Руминия), Мадина (Саудия Арабистони), Тбилиси (Грузия), Тошкент (Ўзбекистон) ва Ереван (Арманистон).
Мадинага парвозлар 2025 йил ноябрь ойида, қолган шаҳарларга эса 2026 йил март ойида бошланади.
Чипталарни аллақачон авиакомпания сайтида банд қилиш мумкин. Тошкентдан Абу-Дабига парвоз нархи бир томонга 605 доллардан (7,68 минг сўм) бошланади. Бу нархга фақат 7 кг гача бўлган қўл юкини олиш мумкин. Таққослаш учун: худди шу йўналишдаги Wizz Air чипталари нархи уч баравар арзонроқ — 10 кг гача қўл юки билан бир томонга 67 доллар ёки 851 минг сўмдан бошланади.
2025 йилда Etihad Airways Прага, Варшава, Сочи ва Атлантага парвозларни йўлга қўйган эди. Шунингдек, у 2026 йил ёзи учун учта янги мавсумий йўналишни эълон қилган. Улар орасида Краков (Польша), Салала (Уммон) ва Қозон (Россия) бор. 2025 йил охиригача Etihad яна 13 та йўналишни ишга туширишни режалаштирмоқда.
Бундан аввал Wizz Air лоукостер авиакомпанияси геосиёсий ва операцион муаммолар туфайли жорий йил сентябрь ойидан бошлаб Абу-Даби (БАА) шаҳридан барча рейсларни тўхтатишни режалаштирганини маълум қилганди.
Изоҳ (0)