Ўзбекистон терма жамоаси ва Москванинг “ЦСКА” клуби ярим ҳимоячиси Аббосбек Файзуллаев Туркия Суперлигаси вакили — “Башакшеҳир” клубига ўтишга жуда яқин. Бу ҳақда Первий Спорт нашри ўз манбаларига таяниб хабар бермоқда.
Манбага кўра, Истанбул клуби москваликлар билан фаол тарзда музокара олиб бормоқда. “Башакшеҳир” Файзуллаев учун 7,5 миллион евро тўлашга тайёр, келишувга эса қўшимча бонуслар ҳам киритилиши мумкин. Эътиборлиси, “Башакшеҳир” ушбу тўловни бир йўла, бир марталик тўлов тарзида амалга оширишга тайёрлиги билдирилган.
“ЦСКА” 21 ёшли ҳужумкор ярим ҳимоячини 2023 йил Тошкентнинг “Пахтакор” клубидан атиги 500 минг евро эвазига сотиб олганди. Унинг амалдаги шартномаси 2026 йил ёзида якунига етади, шунинг учун Москва клуби уни айнан шу трансфер ойнасида сотишни режалаштирмоқда.
Маълумот учун, Файзуллаев ўтган мавсум “ЦСКА” сафида 39 та ўйинда иштирок этиб, 3 та гол ва 8 та голли узатма муаллифи бўлган. У Россия Премьер Лигасининг энг яхши ёш футболчиси сифатида эътироф этилган. Transfermarkt портали эса унинг қийматини 8 миллион евро деб баҳоламоқда.
Изоҳ (0)