Турли сабабларга кўра автомобилида кондиционери йўқ ёки ишламайдиган ҳайдовчилар иссиқдан қандай ҳимояланиши мумкинлиги ҳақида маълумот бериб ўтамиз.
Кондиционер ишлатиш ўрнига ойнани очиб юриш мумкинлиги ҳеч кимга сир эмас. Қанча тез юрилса, шунча кўп шабадани ҳис қилиш мумкин бўлиб, шу билан бирга, ёнилғи одатдагидан кўпроқ сарфланади. Бундан ташқари, салонда шовқин кўпроқ эшитилади ва ташқаридаги чанг ва ҳашаротлар ҳаво фильтрини четлаб ўтиб, тўғри ўпкангизга боради. Ҳайдовчининг кўзига чанг, қум ва ҳашаротлардан бири кириши эҳтимоли ҳам юқори бўлади ва бу, табиийки, транспортни бошқариш давомида чалғишга олиб келади. Катта тезлик билан ойнани очиб юрганда нафақат ҳайдовчи, балки йўловчининг бўйни, елкасини шамол «уриши» ҳам мумкин бўлади. Айнан шу сабаб ҳам кондиционер ишламаётган бўлса ва машина салонида бир ўзингиз бўлсангиз, орқа тарафдаги ойнани очиб қўйинг. Бу орқали сиз шамоллаш ва кўзга чанг кириши эҳтимолини камайтирган бўласиз.
Машина қизиб кетмаслигига эътибор қаратинг
Кондиционер ишламаётган бўлса, машина иссиқда қолиб кетмаслигига диққат қилинг. Салқин ва дарахт соясининг тагида тўхташга ҳаракат қилинг. Автоғилофдан фойдаланиш ҳам яхши самара беради.
Ойналар учун махсус термоплёнкадан фойдаланиш мумкин
Атермал плёнка «тонировка»нинг бир тури бўлиб, ультрабинафша нурларидан ҳимоя қилувчи «адгезион» ва инфрақизил нурларни ўзига олишга мўлжалланган металл билан қопланган қатламлардан иборат. Одатий «тонировка»дан фарқли равишда атермал вариант қуёш нурларини тўлиқ ўтказмай қўймайди. Табиийки, сифатли атермал плёнкаларда ҳеч қандай чекланишлар бўлмаслиги мумкин. Эслатиб ўтамиз, техник регламентга кўра, орқа (лобовой) ва олд ойналарнинг ёруғликни ўтказиши 70% дан кам бўлмаслиги керак. Одатий классик «тонировка»дан ҳам фойдалансангиз бўлади. У ҳам қуёш нурларини салон ичига тўғридан-тўғри киришидан ҳимоя қилади.
Қўшимча вентилятордан фойдаланинг
Қуёш батареяси ёки борт «розетка»сида ишлайдиган вентилятор салонни салқинлаштиришга оз-моз ҳисса қўшиши мумкин. Ойналар қисқа вақтга очилса, қўшимча вентилятор қиздирилган машинадан иссиқ ҳавони тезда чиқаришга ёрдам беради. Қолаверса, портатив кондиционер ҳам яхши самара беради.
Зарур чоралар
Кондиционери ишламайдиган ҳайдовчилар нам сочиқни бўйнига ёки иситгич дефлекторлари устига ташлаб қўйиш кераклигини яхши билади. Бу усул ёрдам беради, албатта, аммо самараси қисқа вақт бўлади. Жазирамада сочиқ қуриб қолади ва уни тез-тез намлаб туришга тўғри келади. Иссиқ ҳароратда машина ҳайдашда оч кийимлар масалан, шорти ва футболка кийиш тавсия қилинади. Шунингдек, салондаги юқори ҳарорат билан курашишнинг осонлашиши учун пойабзални ечиб олиш ёки шиппак кийиш керак. Соч ва қулоқ супраларини мунтазам равишда сув билан намлаб туриш ҳам ёрдам бериши мумкин.
Халқона усуллар
Машинага совуқ сув ва латта солиб қўйиб, вақти-вақти билан рул, ўриндиқ ҳамда салоннинг бошқа чарм билан қопланган элементларини артиб туриш тавсия қилинади. Натижада юзалардаги иссиқлик 5-10 даражага пасаяди. Сублимация жараёнида кислородни сиқиб чиқариб, бўғилишга олиб келиши мумкинлиги сабаб салонни салқинлаштириш учун муздан фойдаланиш тавсия қилинмайди.
Изоҳ (0)