Хитойлик олимларнинг хулосасига кўра, қаттиққўл оналарнинг фарзандлари ақлий қобилияти бошқаларга қараганда яхшироқ ва янги маълумотни ўзлаштириши осонроқ кечади, аммо виждонийлик, хайрихоҳлик, экстраверсия, очиқлик ва ҳиссий барқарорлик каби шахсий кўникмаларни ривожлантиришда қийинчиликларга дуч келади, деб ёзади PsyPost.
Мутахассислар тарбиянинг қатъий усулларига амал қиладиган ва болалардан ўқишда доимий аъло баҳолар ва муваффақият талаб қиладиган аёлларни “йўлбарс оналар” деб аташди. Улар 2014 йилда Хитойнинг 25 та провинцияси ва автоном туманларини қамраб олган China Family Panel Studies тадқиқоти давомида олинган маълумотларни таҳлил қилди. Ушбу тадқиқот доирасида муайян оилаларда қарорлар қандай қабул қилиниши ўрганилди.
Олимлар болаларнинг когнитив қобилиятларини сўзларни эслаб қолиш, математика тестлари ёрдамида ўрганди, шахсий кўникмаларни инсон шахсининг беш факторли модели: виждон, хайрихоҳлик, экстраверсия, очиқлик ва ҳиссий барқарорлик орқали баҳолади.
Натижаларга кўра, хитойлик оналарнинг тахминан 49 фоизи “йўлбарс она” моделига мос келган, уларнинг фарзандлари одатда когнитив тестларни яхшироқ бажарган, аммо шахсий фазилатлар бўйича тенгдошларидан ортда қолган. Мутахассислар тушунтиришича, бундай болаларнинг бўш вақт деярли йўқлиги сабабли когнитив бўлмаган тестларда яхши натижа кўрсатмайди.
“Оналар фарзандларининг таълим олишини ўта қатъий назорат қилса, уларнинг бўш вақти, ижодий ривожланишига путур етади, шунингдек, оиладаги муносабатлар ёмонлашади”, деб ҳисоблайди олимлар.
Изоҳ (0)