Андижон вилоятининг бир нечта ҳудудларида жами 1 млрд сўмдан ортиқ электрдан ноқонуний фойдаланиш ҳолатлари аниқланди.
Бош прокуратура ҳузуридаги Департаментнинг хабарига кўра, Андижон шаҳри ва Хўжаобод туманида ЯТТ А.У. ўзининг савдо дўконида ҳамда “М.П.” МЧЖ масъул шахслари “Баҳрин” МФЙ ҳудудидаги умумий овқатланиш ошхонасида жами 531,6 млн сўмлик электрдан ноқонуний фойдаланиб келган.
Мазкур ҳолатлар юзасидан Жиноят кодексининг 169-моддаси (ўғрилик) билан жиноят ишлари қўзғатилиб, тергов ҳаракатлари ўтказилмоқда.
Ўзэнергоинспекциянинг хабар беришича, Избоскан туманида жойлашган Насос станциялари энергетика бошқармаси истеъмол қилинган электрни ҳақиқий кўрсатгич бўйича ҳисобот бермасдан, ноқонуний фойдаланиб келган.
Ушбу қоидабузарлик натижасида электр таъминоти корхонасига 352,5 млн сўмлик зарар етказилган.
Шунингдек, Балиқчи тумани, “Сирмоқ” МФЙда жойлашган Насос станциялари энергетика бошқармасида ҳам шундай ҳолат аниқланди. Унда электр таъминоти корхонасига 121,4 млн сўмлик зарар етказилган.
Ҳозирда ҳуқуқни муҳофаза қилиш органлари томонидан терговга қадар текширув ишлари олиб борилмоқда.
Бундай ҳолатлар сони ортиб бормоқда
Самарқанд вилоятидаги корхоналардан бири 553 миллион сўмлик электрдан ноқонуний фойдалангани аниқланганди. Шу билан бирга, Қашқадарёда 177 млн сўмлик газ ва “свет”дан ноқонуний фойдаланган шахслар ушлангани хабар қилинганди.
Шунингдек, Қашқадарёда электрдан ноқонуний фойдаланган корхона давлатга 1 млрд сўмдан зиёд зарар етказган. Бундан ташқари, Тошкент, Самарқанд ва Қашқадарё вилоятларида энергия ресурсларига ноқонуний уланиш ҳолатлари фош этилганди. Шунингдек:
- Бухорода 1,2 млрд сўмлик электрдан ноқонуний фойдаланилгани аниқланди.
- Қорақалпоғистоннинг учта ҳудудида 845 млн сўмлик газдан ноқонуний фойдаланилди.
- Бухоро ва Жиззахда электрдан ноқонуний фойдаланганлар 360 млн сўмдан зиёд зарар етказди.
- Учта вилоятда қарийб ярим млрд сўмлик газдан ноқонуний фойдаланилди.
2025 йил май ойида ўтказилган текширувлар натижасида истеъмолчилар томонидан энергия ресурсларидан ноқонуний фойдаланилган 229 та ҳолат аниқланиб, тизимга 94 миллиард 887 миллион сўмлик зарар етказилгани маълум бўлди.
Жумладан, ноқонуний фойдаланишлар натижасида:
- 35,6 миллион кВт соат электр энергияси (тахминан 57,9 миллиард сўм) ва
- 13,2 миллион метр куб табиий газ (тахминан 36,9 миллиард сўм) талон-торож қилинган.
Назорат тадбирлари якунига кўра, энергия ресурсларидан фойдаланиш қоидаларини бузган истеъмолчилар бўйича 448 та маъмурий иш расмийлаштирилди. Белгиланган тартибда чоралар кўрилиб, тегишли ҳужжатлар ҳуқуқни муҳофаза қилувчи органларга тақдим этилди.
Изоҳ (0)