8,6 млрд сўмлик зарар: Хоразмда электрдан ноқонуний фойдаланаётган корхона фош бўлди

Хоразм вилоятида 8,6 млрд сўмлик электр энергиясидан ноқонуний фойдаланган МЧЖ фош этилди, деб хабар бермоқда Ўзэнергоинспекция.

Унга кўра, ҳолат Ўзэнергоинспекция Хоразм вилоят ҳудудий бошқармаси томонидан ИИБ иштирокида ўтказилган назорат тадбирида аниқланган. Урганч тумани “Оқ ариқлар” МФЙда жойлашган “И.Т.Б.Қ.” МЧЖ суғориш мақсадида фойдаланаётган сув насослари учун электр таъминоти билан шартнома расмийлаштирмасдан электр энергиясидан ноқонуний фойдаланиб келаётган бўлган.

Ушбу қоидабузарлик натижасида дастлабки ҳисоб-китобларга кўра электр таъминоти корхонасига 8 миллиард 672 миллион сўмлик зарар етказилгани маълум бўлди.

Ҳозирда ҳуқуқни муҳофаза қилиш органлари томонидан терговга қадар текширув ишлари олиб борилмоқда.

Бундай ҳолатлар сони ортиб бормоқда

Самарқанд вилоятидаги корхоналардан бири 553 миллион сўмлик электрдан ноқонуний фойдалангани аниқланганди. Шу билан бирга, Қашқадарёда 177 млн сўмлик газ ва “свет”дан ноқонуний фойдаланган шахслар ушлангани хабар қилинганди.

Шунингдек, Қашқадарёда электрдан ноқонуний фойдаланган корхона давлатга 1 млрд сўмдан зиёд зарар етказган. Бундан ташқари, Тошкент, Самарқанд ва Қашқадарё вилоятларида энергия ресурсларига ноқонуний уланиш ҳолатлари фош этилганди. Шунингдек: 

• Бухорода 1,2 млрд сўмлик электрдан ноқонуний фойдаланилгани аниқланди.
• Қорақалпоғистоннинг учта ҳудудида 845 млн сўмлик газдан ноқонуний фойдаланилди.
• Бухоро ва Жиззахда электрдан ноқонуний фойдаланганлар 360 млн сўмдан зиёд зарар етказди.
• Учта вилоятда қарийб ярим млрд сўмлик газдан ноқонуний фойдаланилди.

2025 йил май ойида ўтказилган текширувлар натижасида истеъмолчилар томонидан энергия ресурсларидан ноқонуний фойдаланилган 229 та ҳолат аниқланиб, тизимга 94 миллиард 887 миллион сўмлик зарар етказилгани маълум бўлди.

Жумладан, ноқонуний фойдаланишлар натижасида:

• 35,6 миллион кВт соат электр энергияси (тахминан 57,9 миллиард сўм) ва
• 13,2 миллион метр куб табиий газ (тахминан 36,9 миллиард сўм) талон-торож қилинган.

Назорат тадбирлари якунига кўра, энергия ресурсларидан фойдаланиш қоидаларини бузган истеъмолчилар бўйича 448 та маъмурий иш расмийлаштирилди. Белгиланган тартибда чоралар кўрилиб, тегишли ҳужжатлар ҳуқуқни муҳофаза қилувчи органларга тақдим этилди.