Meta компанияси 24 ёшли сунъий интеллект тадқиқотчиси Метт Дейткега компанияда тўрт йил ишлаши учун 250 миллион долларлик шартнома таклиф қилди. Бу ҳақда The New York Times хабар берди.
Дастлаб Дейткега акциялар ва нақд пуллар кўринишида 125 миллион доллар таклиф этилган, бироқ бу миқдор унга етарли бўлмагач, Марк Цукерберг бевосита учрашиб, суммани икки баравар оширган. Янги шартномага кўра, биринчи йилнинг ўзида у 100 миллион долларгача қисмини олиши мумкин.
Дейтке аввал Allen Institute for AI’да ишлаган ва “Molmo” мултимодал чатботини ишлаб чиқишда фаол иштирок этган. Шунингдек, у Vercept номли стартап асосчиси бўлиб, ушбу компания мустақил ишловчи сунъий агентлар яратишга ихтисослашган. Vercept атиги 10 нафар ходимга эга бўлса-да, собиқ Google раҳбари Эрик Шмидт бошчилигидаги инвесторлар томонидан 16,5 миллион доллар сармоя жалб қилган.
Сўнгги вақтларда Meta, Microsoft, Google ва OpenAI бир-бирининг ходимларини шу қадар фаол равишда жалб қилмоқдаки, интернетда ишга олиш ҳақидаги эълонлар спортчиларнинг алмашинув (трансфер) жадвалига ўхшаб қолган.
Маълумот учун: Meta 2025 йил бошида сунъий интеллектни такомиллаштириш бўйича кадрлар ёллашга 1 миллиард доллардан ортиқ маблағ сарфлади. Компаниянинг йиллик капитал харажатлари эса 72 миллиард долларга етиши кутилмоқда.
Массачусетс технологиялар институти иқтисодчиси Девид Аутор бу ҳолатни “бугун IT мутахассислари профессионал спортчилар даражасида маош олаётган давр”, дея изоҳлади.
Изоҳ (0)