Буюк Британия қироли Чарльз III бошчилигидаги Миллатлар ҳамдўстлиги аъзоси бўлган Гренада давлати Британия монархига содиқлик қасамёдидан расман воз кечди. Бу ҳақда The Guardian нашри хабар берди.
“Ушбу тузатишнинг бир овоздан қўллаб-қувватланиши бизнинг миллий ўзига хослик ва конституциявий ривожланишга бўлган умумий садоқатимизни кўрсатади. Гарчи кўплаб масалаларда фикрларимиз турлича бўлса-да, бугун биз биргаликда садоқатимиз Гренада ва унинг халқига тегишли эканини тасдиқлаймиз”, деди Гренада бош вазири Дикон Митчелл.
Ўзгартиришлар содиқлик қасамёдидан “унинг олий ҳазратлари қирол Чарльз учинчи, унинг меросхўрлари ва ворислари” иборасини олиб ташлаб, ўрнига “Гренада” сўзини киритади. Тузатиш турли конституциявий қоидаларни, жумладан, депутатлар, вазирлар ва никоҳ қилаётган фуқароларнинг қасамёдини, шунингдек, содиқлик қасамёди белгиланган бошқа қонунларни қамраб олади.
“Бу ўзгариш Гренаданинг суверенитети ва ўзига хослигини мустаҳкамлаган ҳолда, мамлакат ва унинг халқига тўғридан-тўғри содиқликни тасдиқлаш бўйича кучайиб бораётган миллий кайфиятни акс эттиради”, дейилади баёнотда.
Гренада — конституциявий монархия бўлиб, мамлакат Миллатлар ҳамдўстлиги таркибига киради ва расмий давлат раҳбари Буюк Британия монархи ҳисобланади. Унга генерал-губернатор вакиллик қилади ва у асосан тантанали вазифаларни бажаради.
Миллатлар ҳамдўстлиги 56 та мустақил давлат бирлашмасидан иборат бўлиб, унга Буюк Британия ва унинг деярли барча собиқ доминионлари, мустамлакалари ва протекторатлари, шунингдек, Мозамбик, Руанда ва Габон киради. Ҳамдўстлик мамлакатларининг умумий аҳолиси икки миллиарддан ортиқ ҳамда унинг раҳбари Британия монархи ҳисобланади.
Изоҳ (0)