Мўғулистоннинг Tavan Vogd Holdings LLC. компанияси ва Ўзбекистон Соғлиқни сақлаш вазирлиги ўртасида ўзаро англашув меморандуми имзоланди, деб хабар беради вазирлик матбуот хизмати.
Меморандумдан кўзланган мақсад Ўзбекистонда Япониянинг Fujifilm Group компаниясининг сунъий интеллектга асосланган NURA тиббий профилактика скрининг марказини очиш ва бу орқали фуқароларнинг ҳаёт сифатини яхшилашдир.
Ҳужжатга асосан Tavan Vogd Holdings LLC. компанияси Ўзбекистонда дастлабки босқичда 10 миллион доллар миқдоридаги ўз сармояси ҳисобига NURA тиббий профилактика скрининг марказини ташкил этади ва ишга туширади. Бунда 160 та янги иш ўрни яратилиши кўзда тутилмоқда.
Соғлиқни сақлаш вазирлиги эса ўз навбатида, NURA тиббий профилактика скрининг марказига Ўзбекистоннинг амалдаги қонунчилигига мувофиқ белгиланган тартибда мамлакатда тиббий хизмат кўрсатиш ҳамда фаолият юритиш учун олиб кириладиган тиббий техникани рўйхатдан ўтказиш учун лицензия олишда кўмаклашади.
Маълумот учун, Fujifilm Corporation корпорацияси Япониядаги бош компания бўлиб, ўз фаолиятини Мўғулистонда NURA бренди остида сунъий интеллектга ҳамда саратон ва турмуш тарзи билан боғлиқ касалликларнинг профилактик тиббий скринингига ихтисослашган тиббий скрининг марказлари орқали олиб боради.
Мўгулистон президенти Ухнаагийн Хурельсух рафиқаси Лувсандорж Болорцецег ҳамроҳлигида Ўзбекистонга 23 июнь куни ташриф буюрган эди. 24 июнь куни Кўксарой қароргоҳида уларни расмий кутиб олиш маросими бўлиб ўтди. Ташриф давомида Ўзбекистон—Мўғулистон ҳамкорлигини кенгайтиришга қаратилган 14 та ҳужжат имзоланди.
Изоҳ (0)