Маълум қилинишича, мамлакат элчихонаси кўмагида Ўзбекистон Ташқи меҳнат миграцияси агентлиги ва Литванинг WorldHalal trust ҳамда FА Solutions компаниялари раҳбарияти ўртасида музокаралар ташкил этилди.
Учрашувда Литва компанияларига Ўзбекистон фуқароларини қонуний тарзда ишга жойлаштириш масалалари муҳокама қилинди. Музокаралар натижасида 200 нафар ватандошни Литва корхоналарига ишга қабул қилиш тўғрисида келишувга эришилди.
Томонлар ўртасида тузилган келишувга кўра, Ўзбекистон фуқаролари гўшт маҳсулотларини ишлаб чиқариш, қадоқлаш ва қайта ишлаш корхоналарида иш билан таъминланади. Литвада иш билан таъминланадиган Ўзбекистон фуқароларининг 50 кишидан иборат биринчи гуруҳи шу йил ноябрь ойида Вильнюс шаҳрига жўнатилиши режалаштирилмоқда.
WorldHalal trust — Литва, Греция, Буюк Британия, Қозоғистон, Ўзбекистон, Мўғулистон, Беларусь, Россия, Туркия ва Хитойда жойлашган ҳалол сертификатлаш соҳасида кўп йиллик тажрибага эга компания ҳисобланади. Компаниянинг асосий фаолияти гўшт, сут, гигиена ва фармацевтика маҳсулотларини ишлаб чиқарувчиларни сертификатлашдан иборат. Корхона йирик фермер хўжаликлари, қорамол ва парранда гўштини қайта ишлаш қувватларига эга.
Февраль ойида ўзбекистонликлар Литвага икки соҳа бўйича ишга таклиф қилинган эди. Иш ҳақи — 700 евро (тикувчилик учун), 1600 евро (юк автомобили ҳайдовчиси учун). Иш берувчи ҳисобидан ётоқхона ва транспорт харажатлари қоплаб берилади. Фуқаро ҳисобидан эса агентлик хизмати, ўқитиш ва кўниктириш учун БҲМнинг 10 баравари, авиачипта, виза тўлови.
Изоҳ (0)