Сунъий интеллект каби тараққиётнинг энг илғор ютуқларидан умумбашарият манфаатлари йўлида оқилона ва самарали фойдаланиш зарур. Бу ҳақда Шавкат Мирзиёев Tashkent Law Spring IV халқаро юридик форуми иштирокчиларига йўллаган табригида қайд этиб ўтди.
Ушбу форум Тошкентда 29–30 май кунлари бўлиб ўтади. Бу йилги тадбирнинг асосий мавзуси — “Рақамли технологиялар даври: келажакка ҳуқуқий назар” бўлиб, жаҳон юридик ҳамжамиятини рақамлаштириш жараёнидаги янги таҳдидлар ва имкониятларни муҳокама қилишга қаратилган.
Форумда 1 200 нафарга яқин иштирокчи, шу жумладан, 150 нафарга яқин хорижий спикер ва расмийлар, 40 дан ортиқ давлат ва халқаро ташкилотлардан вакиллар қатнашади. Форум доирасида 20 га яқин тадбир, жумладан, пленар сессия, маҳорат дарслари, давра суҳбатлари, 4 та кўргазма, шунингдек, илк бор Халқаро ёшлар юридик форуми ҳам ўтказилади.
Форум очилишида президентнинг тадбир иштирокчиларига табриги ўқиб эшиттирилди.
“Анжуманда жаҳоннинг нуфузли ташкилотлари ва 40 дан ортиқ давлатларидан юқори мартабали делегатлар, етакчи олийгоҳлар ва ‘ақл марказлариʼнинг таниқли олимлари ва экспертлари иштирок этаётгани унинг нуфузи ва аҳамияти тобора ошиб бораётганини яққол кўрсатмоқда”, дейилади табрикда.
Давлат раҳбарининг қайд этишича, юксак технологик тараққиёт жараёнида инсон манфаатлари ва адолат тамойилларига амал қилиш, самарали ҳуқуқий механизмларни яратиш, рақамли суверенитетни таъминлаш бўйича халқаро ҳамкорликни ҳар томонлама кучайтиришни даврнинг ўзи тақазо қилмоқда.
“Технологиялар ва виртуал муносабатлар шиддат билан ҳаётимизга кириб келаётган бугунги кунда сунъий интеллект каби тараққиётнинг энг илғор ютуқларидан умумбашарият манфаатлари йўлида оқилона ва самарали фойдаланиш зарур, деб ҳисоблаймиз”, деган Шавкат Мирзиёев.
Президент шахсий дахлсизлик ҳуқуқи ва тараққиёт эҳтиёжлари ўртасида нозик мувозанатни топиш, интеллектуал мулк ҳимояси, соҳада қулай инвестициявий муҳитни таъминлаш, шунингдек, янги воқелик — “рақамли дунё” шароитида давлатларнинг ҳуқуқий трансформация жараёнларига муваффақиятли ўтиши, айниқса, сунъий интеллект йўналишида тизимли ҳамкорликни кучайтириш ва ундан фойдаланиш этикаси бўйича намунавий қоидалар ишлаб чиқиш устувор аҳамиятга эгалигини қайд этди.
Шавкат Мирзиёев ушбу инновацион ҳуқуқий асос мазкур соҳани самарали тартибга солишда барча давлатлар учун ўзига хос намуна бўлиб хизмат қилиши шубҳасизлигини билдириб, форумда ана шу муҳим жиҳатларни алоҳида ҳисобга олиб, энг долзарб масалалар муҳокама қилиниши ҳамда амалий таклиф ҳамда ташаббуслар ишлаб чиқилиши рақамли келажакнинг мустаҳкам пойдеворини яратиш ва рақамли трансформация йўлида яна бир муҳим қадам бўлишига ишонч билдирди.
Изоҳ (0)