Ла Лиганинг 36-тури доирасида “Мальорка” дарвозасига гол урган (2:1) “Реал” ҳужумчиси Килиан Мбаппе тарихий натижа қайд этди. Squawka нашрининг ёзишича, 26 ёшли франциялик футболчи Мадрид клуби тарихида илк мавсумидаёқ 40 марта рақиб дарвозасини ишғол қилган илк футболчига айланди.
Мбаппе 28 та голни Ла Лигада, 7 тасини Чемпионлар Лигасида, 2 тасини Испания Кубогида киритган. Шунингдек, у Интерконтинентал кубоги, Испания Суперкубоги ва УЕФА Суперкубогида ҳам биттадан гол муаллифи айланган.
MisterChip берган маълумотларга кўра, Мбаппе Испания футболидаги илк мавсумида 40 ёки ундан ортиқ гол урган тарихдаги иккинчи футболчи бўлган. Бунгача бундай натижага фақатгина бразилиялик Роналдо эришган — у 1996/97 йилги мавсум “Барселона” сафида 47 та гол урган эди.
Қизиғи, португалиялик Криштиану Роналду эса “Реал”даги илк мавсумида 33 та гол билан кифояланган. Мбаппе аллақачон уни ортда қолдирган. Энди у бразилиялик афсонанинг натижасини янгилашга ҳаракат қилади. Аммо мавсум тугашига 3 тур қолганини ҳисобга олсак, бу Мбаппе учун қийинроқ бўлиши мумкин.
Маълумот учун, Ла Лиганинг 36-тури доирасидаги “Реал” — “Мальорка” учрашувида мадридликлар 2:1 ҳисобида ғалаба қозонди. Карло Анчелотти жамоаси ҳозир онлайн турнир жадвалида 78 очко билан 2-ўринни эгаллаб турибди. Улар асосий рақобатчиси “Барселона”дан битта кўп ўйин ўтказган ҳолда 5 очкога ортда қолмоқда.
Изоҳ (0)