Каталониянинг “Барселона” клуби 17 ёшли футболчи Ламин Ямал Ла Лигада ассистлар бўйича рекорд ўрнатди. Бу ҳақда Opta Sports нашрига таяниб Championat хабар берди.
Статистик порталнинг маълумотларига кўра, 21-асрда Испания чемпионатида 20 ёшгача бўлган ҳеч бир футболчи бир мавсумда Ямал каби кўп голли узатма амалга оширмаган. Ушбу мавсум 17 ёшли футболчи Ла Лига доирасидаги 35 учрашувда майдонга тушиб, ўз ҳисобига 9 та гол ва 15 та голли ёздириб қўйган. Умуман олганда, Ламин 2024/25 йилги мавсум давомида “Барселона” таркибида 55 та ўйинда қатнашиб, 18 та гол ва 25 та ассист қайд этди.
Маълумот учун, Ямал 18 ёшга тўлгач, “кўк-анорранглилар” билан узоқ муддатли шартнома имзолаши кутилмоқда. Шунингдек, унинг товон пули 1 миллиард евро этиб белгиланади. Transfermarkt портали ҳозирда Ламиннинг қийматини 180 миллион еврога баҳоламоқда.
Эслатиб ўтамиз, жорий мавсум “Барселона” учун анча омадли кечди. Каталонияликлар 3 та соврин — Испания Суперкубоги ва Кубоги, шунингдек, Ла Лига чемпионлигини қўлга киритди.
Изоҳ (0)