Интернетда ғайриоддий мушук сурати кўплаб фойдаланувчилар эътиборини жалб этди. Баъзилар табиат инъом этган чиройли ташқи кўринишли мушукни мақтаса, қолган фойдаланувчилар эса унинг расми сунъий интеллект томонидан яратилган, дея суратдан шубҳаланди.
Маълум бўлишича, ноодатий рангга эга мушукнинг лақаби Брюс. Ветеринар кўригидан ўтган Менуэт ёки Наполеон зотли жониворнинг бу ғайриоддий ранги мутация сабабли содир бўлган.
Мушук суратларини Reddit фойдаланувчиси дўстлари билан баҳам кўрди ва пост қисқа муддат ичида қизғин муҳокамаларга сабаб бўлди. Бир нечта фойдаланувчилар мушукни зотдор ва кам учрайдиган ноёб тур деб атаган, қолганлар эса мазкур пост ҳақиқатдан йироқ эканлиги ва расм сунъий интеллект ёрдамида яратилганини тахмин қилган. Чунки расм орқа фонида тушунарсиз ёзувлар ва хираликлар кўп эди.
Аслида фотосурат ҳақиқий эканлигини мушук эгаси тасдиқлади. Бир неча соатдан сўнг у Брюснинг бошқа суратларини тармоққа жойлади ва изоҳларда мушук чиндан ҳам ҳаётда мавжуд эканлиги ҳамда камёб генетик мутация жараёни туфайли ҳайвон шундай кўринишда дунёга келганини ёзиб қолдирди.
Изоҳ (0)