Британиялик машҳур актёр Орландо Блум “Кариб денгизи қароқчилари” франшизасида Уилл Тёрнер роли билан яна экранга қайтишга тайёр эканини маълум қилди. Бу ҳақда у ITV телеканалининг This Morning дастурида берган интервьюсида айтиб ўтди.
“Менимча, жамоани янги лойиҳа учун яна бир бор йиғиш яхши бўлар эди. Бундай имконият албатта бор”, деди 47 ёшли актёр.
Дисней студияси машҳур франшизанинг навбатдаги қисмини суратга олиш ниятида экани ҳақида миш-мишлар бир неча йилдан бери тарқалмоқда. Лойиҳа бир неча сабаблар, хусусан, сценарийга ўзгартиришлар киритилиши, COVID-19 пандемияси, бош рол ижрочиси Жонни Деппнинг суд жараёнлари ва Голливуддаги обрўсининг пасайиши туфайли кечиктирилган.
Дисней вакиллари 2023 йилда франшизанинг янги қисми устида иш олиб борилаётганини тасдиқлаган. Продюсерлар бир эмас, икки хил йўналишдаги фильм устида ишлаётгани ҳақида хабарлар бор: улардан бири бош қаҳрамонлар билан боғлиқ воқеаларни давом эттирувчи асосий фильм, иккинчиси эса бош қаҳрамон аёл киши бўлган спин-офф лойиҳа бўлиши мумкин.
Орландо Блум франшизанинг илк уч қисмида Уилл Тёрнер образини гавдалантирган. “Кариб денгизи қароқчилари” умумий ҳисобда беш фильмни ўз ичига олади ва дунё бўйлаб $4,5 миллиарддан ортиқ даромад келтирган. Бу уни кино тарихидаги энг даромадли лойиҳалардан бирига айлантирган. Фильмда Жонни Депп ижро этган капитан Жек Читтак образи алоҳида эътибор қозонган. Шунга қарамай, актёрнинг сўнгги йиллардаги суд можаролари уни франшизадан четлатилишига олиб келган.
Янги фильм ҳақида ҳозирча расмий тафсилотлар берилмаган.
Изоҳ (0)