Ҳиндистон ҳукумати 21 август куни пул тикилган онлайн ўйинларни тақиқлаш тўғрисидаги қонун лойиҳасини қабул қилди. Бу ҳақда Reuters хабар берди.
Таҳлилчиларнинг фикрича, янги қонун миллиардлаб долларлик хорижий инвестицияларни жалб қилган соҳа учун катта зарба бўлади. Қонун “зарарли” деб баҳоланган онлайн пулли ўйин хизматларини, уларнинг рекламаси ва уларга боғлиқ молиявий операцияларни тақиқлайди. Ҳукумат бундай ўйинлар фуқароларнинг психологик ҳолати ва молиявий барқарорлигига салбий таъсир кўрсатаётганини таъкидлаган.
Қонун лойиҳаси маъқуллангани ортидан Ҳиндистоннинг энг йирик ўйин кампанияларидан бири — Nazara Tech акциялари кескин тушиб кетган. Хусусан, акциялар 20 август куни 11 фоизга, кейинги кун эса умумий ҳисобда 21 фоизга арзонлашиб, тарихидаги энг катта икки кунлик пасайишни қайд этган.
Шунингдек, Delta Corp каби бошқа ўйин кампаниялари ҳам зарар кўрган. Уларнинг акциялари дастлаб 3 фоиз, кейин яна 2 фоизга тушган.
Lumikai venchur капитал фирмаси ҳисоб-китобларига кўра, Ҳиндистондаги онлайн пулли ўйинлар бозори 2029 йилга бориб 3,6 миллиард долларга етиши кутилаётган эди. Эндиликда эса ушбу соҳанинг келажаги жиддий савол остида қолмоқда.
Изоҳ (0)