Ҳар бир оилада фарзанд дунёга келиши катта қувонч билан кутиб олинади. Аммо чақалоқ тузалмас генетик касаллик билан туғилса ва соғайишга умид бўлмаса, нима қилиш керак? Албатта, фарзандга бор меҳр, эътибор ва яхшиликларни беришга тайёр туриш лозим.
Қуйидаги юлдузлар айнан шундай йўл тутди. Улар чексиз меҳри билан ўзига хос фарзандларини парвариш қилиб келмоқда.
Колин Фаррелл
Ирландиялик актёр Колин Фаррелл хорижий нашрга берган интервьюсида ўғли Жеймс соғлиғи ҳақида тафсилотлар билан бўлишди. Юлдузнинг фарзанди оғир касалликдан — Ангелман синдромидан азият чекмоқда. Бундай ташхис билан оғриган беморларда тез-тез томир тортишиши ва асоссиз баланд кулиш ҳолатлари кузатилади. Жеймс илк қадамларини 4 ёшида ташлаган, 7 ёшида гапирган, 13 ёшида эса биринчи марта мустақил равишда овқатланган. Колин боланинг онаси билан узоқ йиллар аввал ажрашган, аммо ўғлининг ҳолидан ҳамиша хабар олиб туради.
Ангелман синдроми асаб тизимига таъсир қиладиган кам учрайдиган генетик касалликдир. У ақлий заифлик, нутқ ва мувозанат билан боғлиқ муаммолардан иборат. Ангелман синдромли одамлар кўпинча табассум қилиб юради. Фаррелнинг сўзларига кўра, Жеймс ўз-ўзига ғамхўрлик қила олмайди, шунинг учун 20 ёшли йигитга кеча-ю кундуз ёрдамчи ҳамшира қарайди.
Колин жамият ўғлига ҳурмат билан муносабатда бўлишига, унинг устидан кулмаслик, таҳқирламаслик ва ажратмасликларига умид қилади.
Женя Огурцова (“Ранетки” сериали юлдузи)
“Ранетки” гуруҳининг собиқ аъзоси Женя Огурцова икки фарзанднинг онаси. Унинг кенжа қизи Ева ахондроплазиядан азият чекади. Axonдроплазия — узун, найсимон суяклар ўсишининг сусайиши билан характерланадиган доминант касаллик. Унга кўра бош ва гавда ўлчамлари меъёрида бўлса ҳам қўл, оёқлар жуда калта бўлади. Уларда насл қолдириш хусусияти анча сустлашади.
Актрисанинг ўзи шахсий блогида бундай болалар оддий болалардан ҳеч қандай фарқ қилмаслиги ва жамият буни тезроқ тушуниши кераклигини бот-бот такрорлаб келади.
Жон Траволта
Голливуд актёрининг Жетт исмли ўғли 2009 йилда 17 ёшида вафот этди. Бунга эпилептик тутқаноқ сабаб бўлди. Машҳурнинг мухлислари унинг ўғлида соғлиқ билан боғлиқ муаммолари борлигидан бехабар эди. Жон ҳеч қачон интервьюларида бу ҳақда гапирмаган.
Фақат ўша фожиадан сўнггина Траволта ўғлининг ўзига хос бола эканлигини тан олди — унга Кавасаки синдроми, аутизм, эпилепсия ва астма ташхиси қўйилган эди. Траволта ўғлининг ўлимини ҳаётидаги энг даҳшатли синов деб билади..
Кира Найтли
“Кариб денгизи қароқчилари” юлдузи ҳам кутилмаган хабар билан мухлисларини ҳайратда қолдирди. Кира Найтли журналистларга унинг қизлари онасининг касаллигини мерос қилиб олганини айтди. Кира бутун умри давомида дислексиядан азият чеккан.
Ушбу касаллик болаларда матнни тўғри ўқий олмаслик, ҳарфларни танишда қийналиш ва умуман матнни тушунишга қийналиш билан намоён бўлади. Шу сабабли актриса сценарий билан танишиши учун одатдагидан кўпроқ вақт кетади.
Кира Найтлининг икки нафар қизи бор, лекин айнан қайси фарзанди дислексия касаллигига чалинганини аниқлаштирмади. Актрисанинг сўзларига кўра, уйда аудио форматидаги китоб ва матнларни тинглаш орқали ушбу муаммога ечим топишган.
Изоҳ (0)