Британиянинг Катта Манчестер графлигида жойлашган Каррингтон қишлоғида яшовчи Аманда Барон (ҳозирда Аманда Барон-Жонс) хонанда Эд Ширанга жуда ўхшаш бўлган Тай Жонсга турмушга чиқди. Бу ҳақда “Правила жизни” нашри ёзмоқда.
Аманда британиялик қўшиқчининг ашаддий мухлисаси. Авваллари у фақат Эд Ширанга турмушга чиқаман, дея ҳазил қилар эди. Икки йил аввал Аманда хонанданинг концертида Эднинг қиёфадоши — Тай Жонс билан танишиб қолди. Орадан кўп ўтмай жуфтлик фарзандли бўлишди: янги туғилган чақалоққа ҳақиқий Эд Ширан рафиқасининг шарафига Черри исми қўйилди. Орадан бир йил ўтгач, Тай Амандага турмуш қуриш таклифини берди.
Аманда ва Тай тўй кунини “ҳаётларининг энг ажойиб лаҳзаси” деб атайди. Маросим Эд Ширан услубида ташкил этилди: тўйга аталган торт усти хонанда қўшиғидан олинган сатр билан безатилди, келин эса қўшиқчининг исми ёзилган шиппак билан намоён бўлди.
Эр-хотин тўйхонага Эд Шираннинг “Оne Life” қўшиғи остида кириб келди ва “I Don't Care” қўшиғи янграган чоғда маросимни якунлашди.
Келин-куёв валси учун жуфтлик бошқа бир британиялик қўшиқчи — Жеймс Артурнинг қўшиғини танлади.
“Жеймс Артур менинг энг севимли қўшиқчиларимдан бири. Қолаверса, биз тўйни фақат Эд Ширан мавзусида ўтказишни истамадик. Одамлар буни ғалати ва нотўғри дея қабул қилган бўлар эди”, — деди Аманда.
Айтганча, куёв маросимдаги ягона машҳур қиёфадош эмас эди. Тўйга Буюк Британия шаҳзодаси Гарри, британиялик бош-ошпаз Гордон Рамзи, футболчи Девид Бекхем ва “Кариб денгизи қароқчилари”даги Жек Читтак образи қиёфадошлари ташриф буюрди.
Афсуски, ҳақиқий хонанда Эд Ширан тўйда қатнаша олмади, лекин янги оилага виртуал тарзда ўзининг табрикларини йўллади. Аманда ва Тай асал ойини ўтказиш учун Руминияга отланмоқда.
Тай Жонс бир неча йиллардан бери TikTok аккаунтини юритиб келмоқда. Унинг тармоқда 180 мингдан ортиқ обуначилари бор. Блогер кулгили видеолар жойлайди, ҳаётининг гўзал ва қизиқарли лаҳзалари билан ўртоқлашади ҳамда гитара чалган видеоларини юклайди.
“Фойдаланувчилар доим видеоларимга изоҳда ‘Эй худойим, бу Эд Ширан-ку’ деб ёзишади. Мен уларга жавобан: ‘Мен Эд эмасман’ дейман”, — қўшимча қилди Жонс.
Изоҳ (0)