Бразилиянинг “Флуминенсе” клуби посбони Фабио профессионал футбол тарихидаги энг кўп ўйин ўтказган футболчига айланди. Бу ҳақда клубнинг расмий сайти хабар берган.
Унга кўра, 44 ёшли тажрибали дарвозабон Жанубий Америка кубоги 1/8 финал босқичи доирасидаги Колумбиянинг “Америка де Кали” жамоасига қарши баҳсда (2:0) асосий таркибда майдонга тушди. Бу ўйин Фабио учун фаолиятидаги 1391-учрашув бўлди. Шу тариқа у инглиз афсонаси Питер Шилтоннинг (1390 ўйин) узоқ йиллик рекордини янгилади.
Қизиқ томони, Фабио бу ютуққа Бразилия терма жамоасида бирорта ҳам ўйин ўтказмаган ҳолда эришди.
Мен ҳаётим давомида ёнимда бўлган барча инсонларга чуқур миннатдорчилик билдираман, — деди Фабио учрашувдан сўнг.
Энг кўп ўйин ўтказган футболчилар рўйхатида ҳозирда иккинчи ўринда Питер Шилтон (1390 ўйин), учинчи поғонада эса “Ан-Насср” сардори ва Португалия терма жамоаси ҳужумчиси Криштиану Роналду (1283 ўйин) жой олган.
Фабио профессионал фаолиятини 1997 йилда “Униао Бандеиранте” клубида бошлаган. У фаолиятининг катта қисмини “Крузейро” сафида ўтказган бўлиб, бу жамоа таркибида 976 ўйинда майдонга тушган ва 12 та совринга эга чиққан.
Изоҳ (0)