Исроил ва ҲАМАС расмийлари Ғазода ўт очишни тўхтатиш бўйича келишувга эришишга яқин турибди. Бу ҳақда Қатардаги музокаралардан хабардор манбаларга таяниб, Sky News хабар берди.
Музокараларда ҳал қилинмаган ягона масала — Ғазодаги Исроил армиясининг мақоми ва ҳудудда қолиш муддати. Исроил олдида танлов турибди: урушни тугатиб, барча гаровдагиларни олиб Ғазодан чиқиб кетиш ёки минтақани номаълум муддатга ҳарбий назорат остида сақлаб қолиш.
Шунга қарамай, томонлар бир нечта муҳим масалаларда келишувга эришган. Булар қаторига гуманитар ёрдамни етказиб бериш жараёни ва АҚШнинг 60 кунлик ўт очишни тўхтатиш тугагач, Исроил урушни қайта бошламаслигига кафолат бериши киради.
Гуманитар ёрдам масаласида, Исроил армияси чиқиб кетган ҳудудларда ҲАМАС ҳам, Исроил ҳам назорат қила олмайдиган учинчи томон фаолият юритади. Натижада АҚШ ва Исроил томонидан бошқариладиган Ғазо Гуманитар Жамғармаси (ҒГЖ) Исроил ҳарбийлари бўлмаган ҳудудларда ишлай олмайди. Бу ҳолат ҒГЖ фаолиятининг кенгайишини чеклайди. Озиқ-овқат ва ёрдам етказишда БМТ ёки бошқа халқаро ташкилотлар муҳим рол ўйнайди.
Исроилнинг урушдаги асосий мақсади — гаровдагиларни қайтаришдан ташқари, ҲАМАСни ҳарбий ва сиёсий ташкилот сифатида бутунлай йўқ қилишдир. Шу сабабли яҳудий давлати сектордан ҳарбийларини олиб кетишга рози бўлиши номаълум.
Изоҳ (0)