Исроил мудофаа вазири Йоав Галант Ливаннинг “Ҳизбуллоҳ” гуруҳини қаерда ҳаракат қилса, нишонга олишни буюрди. Бу ҳақда Euronews хабар берди.
Галантнинг сўзларига кўра, Исроил Эрон томонидан қўллаб-қувватланадиган Ливан ва Суриядаги “Ҳизбуллоҳ”дан “ҳимояланиш ўрнига таъқиб қилишга” ўтмоқда. Галантнинг баёноти Исроил армияси ҳаво ҳужумида “Ҳизбуллоҳ”нинг ракета бўлинмаси қўмондон ўринбосари Али Абед Аҳсан Наимнинг ўлдиргани фонида эълон қилинди.
Сурия 29 декабрь куни Исроилни Ҳалабдаги “Ҳизбуллоҳ” объектларига ҳаво ҳужуми уюштирганликда айблади. Суриядаги манбаларнинг айтишича, ҳужумда 40 га яқин одам, жумладан тинч аҳоли ҳам ҳалок бўлган бўлиши мумкин. Бу сўнгги йиллардаги энг қонли зарбалардан бирига айланди.
Исроил ва ҲАМАС ўртасида уруш бошланганидан бери деярли ҳар куни Ғазо сектори, Исроил ва Ливан чегарасида тўқнашувлар содир бўлмоқда. Бу вақт ичида Ливан жанубида 270 га яқин “Ҳизбуллоҳ” жангчиси ва 50 нафар тинч аҳоли, жумладан шифокорлар ва журналистлар ҳалок бўлди. Исроил томонида 10 га яқин аскар ва бир неча тинч аҳоли ҳаво ва ракета зарбалари қурбони бўлди.
Шу билан бирга, Исроил тинчлик музокараларида қатнашишда давом этмоқда. Оқ уй Рафаҳда режалаштирилган операция бўйича қолдирилган музокаралар Вашингтонда ўтказилиши мумкинлигини айтди.
Исроил бош вазири Бенямин Нетаньяху ҲАМАС томонидан гаровга олинганлар ва фаластинлик маҳбусларни алмашиш бўйича Моссад раҳбари бошчилигидаги музокаралар гуруҳига Қатарга боришни буюрди. Исроилнинг яна бир делегацияси Қоҳирага йўл олган.
Изоҳ (0)