Россия бош вазири Михаил Мишустин Россия ва Германия ўртасидаги ҳарбий-техник ҳамкорлик тўғрисидаги битимни бекор қилиш ҳақидаги фармойишни имзолади. Тегишли ҳужжат 18 июль, жума куни ҳуқуқий ахборот расмий порталида эълон қилинган.
“Россия Федерациясининг халқаро шартномалари тўғрисида”ги Федерал қонуннинг 37-моддасига мувофиқ, Россия Федерацияси ҳукумати билан Германия Федератив Республикаси ҳукумати ўртасида 1996 йил 14 июнда Москва шаҳрида имзоланган ҳарбий-техник ҳамкорлик тўғрисидаги битимнинг амал қилишини тўхтатиш ҳақида”, дейилади ҳужжатда.
Ҳужжат билан Россия Ташқи ишлар вазирлигига ушбу қарор ҳақида Германия Федератив Республикасини хабардор этиш вазифаси юкланган.
Россия Ташқи ишлар вазирлиги июнь ойида келишувдан чиқиш ниятини билдирган эди. Вазирлик бу келишув “Германия Федератив Республикаси ҳукуматининг очиқдан-очиқ душманона сиёсати” туфайли “мазмун ва амалий аҳамиятини йўқотгани”ни таъкидлаган. Шунингдек, Германия ҳукуматини “Германия аҳолисига Россияга қарши руҳда мафкуравий таъсир ўтказиш” ва “ҳарбий-сиёсий вазиятни кескинлаштиришга очиқдан-очиқ ундаш”да айблади.
Россия ва Германия Федератив Республикаси ҳукуматлари томонидан 1996 йил 14 июнда имзоланган ҳарбий-техник ҳамкорлик тўғрисидаги битим икки давлат корхоналари, ташкилотлари ва муассасалари ўртасидаги ҳамкорликни назарда тутган эди.
Россиянинг Украинага кенг кўламли босқини бошланганидан сўнг, Германия ва Россия ўртасидаги муносабатлар совуқ уруш давридан буён энг паст даражага тушди. Берлин Киевни Россия тажовузига қарши курашида фаол қўллаб-қувватламоқда. Германия ҳукуматининг расмий маълумотларига кўра, Германия Россия босқини бошланганидан бери Украинага ёрдам учун 40 миллиард евродан ортиқ маблағ ажратган.
Изоҳ (0)