Россиянинг икки вилоятидан 99 нафар бола дам олиш учун Ўзбекистондаги оромгоҳга келди. Бу ҳақда 18 июль куни Россиянинг Ўзбекистондаги элчихонаси хабар берди.
Болалар Россиянинг Белгород ва Брянск вилоятларидан ташриф буюрган. Аэропортда уларни Ўзбекистондаги Россия ишлари бўйича вақтинчалик ишончли вакили Андрей Ланчиков, Касаба уюшмалари федерацияси раҳбарияти ва Ташқи ишлар вазирлиги вакиллари кутиб олган.
Россиялик болаларни Касаба уюшмалари федерацияси меҳмонга таклиф қилган. Улар Тошкент вилоятидаги “Анор” болалар соғломлаштириш оромгоҳида икки ҳафта дам олади.
“Ўзбекистонга етиб келган болаларни мазали ва тўйимли нонушта билан сийладилар ҳамда совғалар топширилди. Эртага эса улар учун лагерда тантанали очилиш маросими бўлиб ўтади”, дейилади манба хабарида.
Элчихона ташкил этилган тадбир учун Ўзбекистон ҳукуматига миннатдорлик билдирган.
Маълумот учун, ўтган ойда 100 нафарга яқин украиналик бола “Анор” оромгоҳида дам олганди. Маданий дастур маҳорат дарслари, экскурсиялар, интеллектуал ўйинлар ва спорт мусобақаларини ўз ичига олган.
Изоҳ (0)