Сибир ўзбекларнинг тарихий ватани эканини айтган Ханти Манси автоном округи думаси депутати Тагизаде Холид Боюкага ўғли мандатидан воз кечди. Бу ҳақда унинг ёрдамчиси Андрей Сисоев “ТАСС”га хабар берди.
Маълумотга кўра, бу масала юзасидан Югра думасининг навбатдан ташқари йиғилиши белгиланган. Тагизаде ижтимоий тармоқлар орқали расмий баёнот бериши ҳам кутилмоқда. У 7 июль куни ваколатидан воз кечиш ҳақидаги аризани топширган, якуний қарор эса 19 июль куни эълон қилиниши мумкин.
Депутатнинг шов-шувли баёноти
29 май куни Тагизаде минтақавий парламент йиғилишида ўзбекистонлик мигрантлар “ўзларининг тарихий ватанига” Юграга келаётганини айтганди. У бир пайтлар Югра ва Тюмен вилоятининг бир қисми Сибир хонлиги таркибига кирганини қўшимча қилган. Ушбу баёнот кенг жамоатчилик норозилигига сабаб бўлган. Хусусан, уни депутатлик ваколатидан маҳрум қилиш, ҳуқуқ-тартибот идораларига эса баёнотнинг Россия қонунчилигига, жумладан, экстремизмга мослигини текшириш таклиф этилган.
3 июнь куни депутат парламент ижтимоий ривожланиш қўмитаси раиси ўринбосари лавозимидан четлатган. Депутатдан оммавий равишда узр сўраш талаб қилинган ва унга жамоат олдида танбеҳ берилган. 3 июль куни эса у “сифатсиз иши” туфайли депутатлик маошидан маҳрум этилган.
Ўз навбатида, эксперт-тилшунослар тадқиқот давомида, прокуратура эса текшируви чоғида қонунбузарлик ҳолатларини аниқламаган. Улар депутат нутқида экстремизм белгилари йўқлигини таъкидлаган.
Тагизаде Холиднинг ўзи “ВКонтакте” ижтимоий тармоғидаги саҳифасида айтган гаплари учун узр сўраган ва унинг баёноти “қатъий даъво эмас, балки тахмин бўлганини” билдирган. У Россия Коммунистик ёшлари иттифоқи асосчиларидан бири, 30 дан ортиқ илмий мақола муаллифи ҳисобланади. Аввал мактаб ўқитувчиси, эксперт-криминалист ва Ички ишлар вазирлиги ходими сифатида фаолият юритган.
Изоҳ (0)