Таиланд Камбоджани қироллик ҳудудида Таиланд—Камбоджа чегараси яқинида пиёдаларга қарши миналар ўрнатганликда айблади. Бу ҳақда Таиланд Ташқи ишлар вазирлигининг расмий веб-сайтида эълон қилинган баёнотда маълум қилинди.
Вазирлик маълумотларига кўра, 16 июль куни Убонратчатхани вилоятининг Чонг Бок туманида Таиланднинг 6021-пиёда ротасига мансуб уч аскар белгиланган йўналиш бўйича режали патруллик пайтида минага дуч келган. Текширув натижасида маълум бўлишича, бу қиролликда қўлланилмаган ва сақланмаган пиёдаларга қарши миналар бўлиб, улар яқинда ўрнатилгани аниқланди.
“Ваколатли хавфсизлик идоралари томонидан ўтказилган баҳолаш ва аниқланган далиллар шуни кўрсатадики, ушбу миналарнинг ўрнатилиши халқаро ҳуқуқнинг қўпол равишда бузилиши ҳисобланади. Таиланд Қироллиги ҳукумати пиёдаларга қарши миналар қўлланилишини қатъиян қоралайди”, дейилади баёнотда.
Шунингдек, Таиланд Камбоджани икки давлат ҳукуматларининг икки томонлама келишувига мувофиқ чегара бўйлаб миналардан тозалаш ишларида ҳамкорлик қилишга чақирган.
28 май куни Таиланднинг Убонратчатхани вилояти ва Камбоджанинг Преа Вихеар вилояти ўртасидаги чегаранинг баҳсли қисмида ўзаро келишилган бетараф ҳудудда икки мамлакат қуруқлик қўшинлари ҳарбий хизматчилари ўртасида тўқнашув юз берганди. Ўн дақиқа давом этган жангда камбоджалик бир ҳарбий оғир даражада яраланганди.
Изоҳ (0)