Классик автомобиллар кўпинча ретро услубдаги кўриниши ва нисбатан арзонлиги туфайли ноодатий модификациялар учун асос қилиб олинади. Аммо италиялик механик Андреа Марацси барчани ҳайратда қолдиришга қарор қилиб, 1993 йилда ишлаб чиқарилган Fiat Panda асосида дунёдаги энг тор автомобилни яратди.
Бир ўриндиқли бу транспорт воситаси атиги ярим метрдан кичик эни билан оддий хетчбекни эмас, кўпроқ мультфильм қаҳрамонини эслатади.
Марацсининг сўзларига кўра, автомобиль устида иш бир йилдан ортиқ давом этган. Шунга қарамай, у 1993 йилги асл моделнинг деярли барча қисмларидан фойдаланишга муваффақ бўлган: фаралар, эшиклар, том қисми ва ғилдираклар ўз ҳолича сақланиб қолган. Энг катта ўзгариш, албатта, кузовга тегишли: у иккига бўлиниб, торайтирилган.
Автомобильнинг асосий функциялари ҳам сақланиб қолган: у ҳаракатлана олади, тўхтайди, бурилиш чироқларини ёқади ва фараларни ишлатади. Бироқ кузов остига ҳеч бир стандарт двигатель сиғмагани сабабли, механик бу муаммони ижодий ёндашув билан ҳал этган: у автомобилга электр самокатнинг двигатели ва 24 волтли аккумулятор ўрнатган. Бу тизим машинага соатига 15 километр тезликда 25 километр масофани босиб ўтиш имконини беради.
Ушбу ноодатий митти машинани одатдаги йўлларда учратиб бўлмайди, чунки автомобиль рўйхатдан ўтмаган ва кўргазма учун намуна сифатида ишлаб чиқилган.
Изоҳ (0)