Исроил музокаралар муваффақиятсизликка учраган тақдирда Ғазо секторини “босиб олиш” бўйича янги режа тайёрлади. Бу ҳақда Исроил телевидениесининг 12-канали хабар берди.
Исроил армияси штаби бошлиғи Эял Замир сиёсий раҳбариятга янги ҳаракатлар режасини тақдим этган. У ўт очишни тўхтатиш бўйича музокаралар амалга ошмаса, кучга киради. Яҳудий расмийлари режани ижобий қабул қилган. Манбаларга кўра, у “Ғазони эгаллаш режаси” деб аталади ва Рафаҳдаги “гуманитар шаҳар”га (лагерга) муқобил ҳисобланади.
Мазкур лагер қурилишига Исроил собиқ бош вазири Эхуд Олмерт қарши чиққан. Сабаби унинг қурилиши фаластинликларни “этник тозалаш” ҳисобланишини билдирган. Лагерга мажбурий кўчириладиган 600 нафар фаластинликка ташқарига чиқишга рухсат берилмайди.
Янги режа Ғазо секторининг янада катта қисмини эгаллаш ва ушлаб туришни ўз ичига олади. Исроил армиясининг фикрича, бу урушнинг иккита асосий мақсадига: гаровга олинганларни озод қилиш ва ҲАМАСни мағлуб этишга эришиш имконини беради.
Уруш мақсадларига зид бўлган гуманитар шаҳар билан курашиш ўрнига, биз ушбу мақсадларга эришишга ёрдам берадиган режа билан жиддий шуғулланишимиз керак, деган Исроил расмийлари.
Исроил раҳбариятининг кўпчилиги Нетаньяхудан уни амалга оширишни сўрамоқда. Бироқ бош вазирнинг атрофидагилар у яқин келажакда ҲАМАС билан келишувга эришишга қатъий қарор қилганини таъкидламоқда.
Изоҳ (0)