АҚШ президенти Дональд Трамп урушни тўхтатиш учун Россияга 50 кун муҳлат берган эди. Республикачи сенатор Линдси Грем мазкур талабни рад этиш оқибатларини маълум қилди.
Грем оқибатларга тўхталишдан олдин АҚШ прездентининг Европа Иттифоқига қурол-яроғ етказиб беришга доир баёнотини ижобий баҳолади. У агар жанглар белгиланган муддат ичида тугамаса, Вашингтон Россиянинг нефтини сотиб олаётган давлатларга 100 фоизгача бож жорий этишини эслатди. Сиёсатчи бу Россия президентининг “энг оғриқли нуқтаси”га зарба бериш ҳисобланишини таъкидлади.
Агар Путин 51-куни нима бўлишини билишни истаса, Оятуллоҳга (Эрон олий раҳнамоси) қўнғироқ қилсин, деди Грем.
У шу тариқа Трампнинг Эрон бўйича сиёсатига ишора қилди. АҚШ президенти Эронни бир неча бор ядровий келишув тузишга чақирган эди. Акс ҳолда мамлакатга зарба бериш билан таҳдид қилганди. Трамп 22 июнга ўтар кечаси Эроннинг учта ядровий объектига ҳужум қилишни буюрган. Грем Россия президентига берган маслаҳати билан шуни назарда тутган.
Трамп 14 июль куни Россияга 50 кун ичида тинчлик келишувига эришиш таклифини берган. Акс ҳолда Россиядан хом ашё ва энергия харид қилаётган давлатларга иккиламчи санкциялар қўлланишини билдирган. АҚШ Вакиллар палатасининг спикери Майк Джонсон ва сенатор Жеймс Каллас бу позицияни қўллаб-қувватлаган, бироқ Европа дипломатияси раҳбари Кая Каллас 50 кунлик ультиматуми “жуда узоқ муддат” эканини таъкидлаган.
Изоҳ (0)