Ливан ҳукумати хавфсизлик манбаси Россия фаластинлик ёш йигитларга Украинадаги урушда қатнашиш учун ойига 350 доллар тўлаётганини маълум қилди. Бу ҳақда The Меdiа Line хабар берди.
Маълум қилинишича, Суриянинг элита қўшинлари ҳам урушга ёлланмоқда. Ливанда яшовчи фаластинликлар Россия томонидан Украинада давом этаётган урушда қатнашиш учун имзо чеккан. Бунинг эвазига уларга 350 доллар маош таклиф қилинган. Урушга ёллаш ишлари Фаластиннинг Ливандаги элчихонасига алоқадор фаоллар томонидан амалга оширилаётгани айтилган.
Рўйхатдан ўтганларнинг аксарияти 1969 йилдан кейин туғилган, чунки улар Ливанда рўйхатдан ўтмаган, бу эса ёлланма аскар сифатида урушга боришни осонлаштиради. Украинадаги фронтга юборилган фаластинликларнинг аксарияти Ливандаги энг йирик фаластинлик қочқинлар лагери Эин ал-Халвадан келади. Урушга ёлланганлар Фаластин маъмурияти президенти Маҳмуд Аббос бошчилигидаги Фатҳ сиёсий ҳаракати ҳамда Фаластинни озод қилиш халқ фронти каби бошқа ташкилотлар аъзолари экани айтилган.
Хабарларга кўра, бу шахслар Россия кучлари номидан Украинадаги можарода иштирок этишга рози бўлиши эвазига оилалари учун ойлик нафақа ва товон пули олади. Ливан хавфсизлик манбаси фаластинликлар ва бошқаларни ёллаш Ливанда жойлашган Эрон томонидан қўллаб-қувватланадиган Ҳизбуллоҳ билан боғлиқлигини билдирди.
“Ҳизбуллоҳ Украинадаги урушда русларга ёрдам бериш учун ёш тарафдорларни, жумладан, дронлардан фойдаланиш қобилиятига эга бўлганлар ва шаҳарларда партизанлар урушида тажрибага эга одамларни фаол равишда жалб қилмоқда”, — дейди манба.
Дубайда истиқомат қилувчи, хавфсизлик ва мудофаа масалалари бўйича таниқли ва фахрий ливанлик тадқиқотчи Риад Каҳважи бунга қуйидагича муносабат билдирган.
“Менда бу борада аниқ маълумот йўқ, лекин лагердаги аҳвол ачинарли ва ёшлар учун иш йўқлиги сабабли бунинг эҳтимоли юқори. Улар иш ҳақи эвазига руслар билан ишлашга жалб қилинган бўлса ажаб эмас, чунки лагер муҳити бундай имкониятлар учун очиқ”, — деди у.
Россия томонида Украинадаги урушга қатнашиш учун қанча фаластинлик ёллангани аниқ эмас, аммо тахминан 300 киши Россияда тезкор тайёргарликдан ўтиб, фронтга жўнатилгани тахмин қилинмоқда. Эин-ал-Халва қочқинлар лагерида 100 га яқин қўшимча жангчилардан иборат яна бир гуруҳ ташкил этилиб, яқин келажакда Россияга жўнатиш учун тайёрланаётгани хабар қилинган.
Лондон ва Истанбулда жойлашган Аbaad стратегик тадқиқотлар маркази директори Муҳаммад Сарминининг айтишича, 2022 йил февралида Россиянинг Украинага бостириб кириши бошланганидан бери Сурия босқинчи рус қўшинларига қўшилиш учун жангчиларни ёллашнинг икки йўлини кўрган. Биринчи йўл “Вагнер” гуруҳи орқали, иккинчи йўл эса Россия томонидан бошқариладиган Сурия мунтазам кучларидан жангчиларни юборишни ўз ичига олади. Мазкур элита жангчилар уруш зонасига бориш учун 500-700 АҚШ доллари олади, бу Сурия стандартлари бўйича жуда юқоридир.
“Россиянинг суриялик жангчиларни ёллаш истаги иккита мақсадни кўзлайди: Украинадаги жангарилари сонини кўпайтириш ва Сурия президенти Башар ал-Ассад режимига содиқлигини намойиш этиш”, — дейилади хабарда.
Фаластиннинг Ливандаги элчихонаси Украинадаги можарога ҳеч қандай алоқаси йўқлигини ва фаластинликларни унда иштирок этишга ундамаётганини айтиб, бу борада изоҳ беришдан бош тортди.
Изоҳ (1)
Tarjimani yorvoribsiz lekin