“Дарё” нашри 7 мартда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Уруш бошланса, АҚШнинг Россиядан ташқари “ядровий рақиблари” ҳам борми?
“Ядровий рақиблари” сони ортиши мумкинлиги сабаб АҚШ зарур бўлган ядро каллакларининг ҳисобини олиши керак. Бу ҳақда АҚШнинг миллий хавфсизлик бўйича собиқ маслаҳатчиси Жон Болтон The Washington Post газетасида ёзди.
Унинг сўзларига кўра, Путин Стратегик қуролларни қисқартириш бўйича келишувда Россиянинг иштирокини тўхтатиш қароридан сўнг, Вашингтон эндиликда нафақат Москва, балки Пекин ҳам унинг ядровий рақиби эканлигини тан олиши керак.
Маслаҳатчининг фикрича, Қўшма Штатлар Россия билан “ядровий қарама-қаршилик”га бориши мумкин ва агар Вашингтон бу вазиятда ғолиб чиқса ҳам, у дарҳол Пекин билан ядровий зиддиятга дуч келади.
“Вашингтон икки рақибга қарши туриш учун АҚШнинг ядровий активлари қанчалик катта бўлиши кераклиги ҳақидаги асосий саволларга жавоб бериши зарур”, — деб ёзади у.
Собиқ маслаҳатчининг қўшимча қилишича, Вашингтон Шимолий Корея ва “ядровий қурол яратишга интилаётган” Эрон Россия ва Хитойни иттифоқчи, АҚШ ва уларнинг ҳамкорларини эса душман деб билишга мойиллигини ҳам ҳисобга олиши лозим.
Нега Россияга қурол етказмаслик шарти, Тайванга сотилаётган қуролларга амал қилмайди?
Хитой ташқи ишлар вазири Син Ган АҚШни Украина ва Тайванга нисбатан муносабати туфайли икки томонлама стандартларда айбламоқда. Вазирнинг айтишича, АҚШ Хитойдан Украинадаги уруш учун Россияга қурол етказиб бермасликни талаб қилса-да, аммо ўзи Тайванга қурол етказиб бермоқда.
Бу муаммони далилларга таяниб таҳлил қиладиган бўлсак вазият қуйидагича:
Ташқи ишлар вазири Синган: Улар нега Хитойдан Россияга қурол етказиб бермасликни талаб қилишмоқда, лекин ўзлари 1982 йил 17 августдаги консенсусни бузиб, анчадан бери Тайванга қурол сотишмоқда?” — деган саволни ўртага ташлади.
СинГан даъво қилаётган масалада фактлар билан танишсак, АҚШ нинг ҳам бу борада тегишли қонуни бор ва бу қонун 1982 йилдан аввалроқ кучга кирган. 1979 йилда ёзилган ушбу қонунга кўра, АҚШ Тайван хавфсизлигига ташқи таҳдидлар юзага келган тақдирда, Вашингтон уни қурол-яроғ билан таъминлаши лозим .
Сўнгги пайтларда Хитой Мудофаа вазирлиги Тайван учун курашишга тайёр эканини бир неча бор таъкидлаган, АҚШ президенти Жо Байден эса оролни ҳарбий йўл билан ҳимоя қилишга тайёрлиги ҳақида гапирган.
Тинч аҳоли жабрланадиган мустақил портловчи авиабомбалар сўралмоқда, сабаби улардан аллақачон фойдаланиляпти
Украина ҳукумати илк бор АҚШдан дронлардан ташлаб портлатиш учун МК-20 кассетали авиабомбаларни сўради. Бу ҳақда Reuters агентлиги манбаларига таяниб, хабардор бўламиз.
Украина февраль ойида Мюнхен хавфсизлик конференциясида 155 та кассетали артиллерия ўқларига қўшимча равишда МК-20 бомбаларини сўраган.
Reuters хабарига кўра, Киев кассетали ўқ-дорилар Украина шарқидаги рус қўшинларига қарши курашда устунлик беришига умид қилмоқда.
Киев узоқ вақт Вашингтондан бундай ўқларни олишга уриниб кўрди, аммо сўровлар рад этилди — АҚШ қонунга мувофиқ ушбу қуролларни экспорт қила олмайди.
Кассетали ўқ-дорилар катта ҳудудларга таъсир қилувчи кўплаб кичикроқ мустақил портловчи қурилмаларни олиб юради. Улар тинч аҳолига таҳдид солиб, катта майдонга беихтиёр зарба бериши мумкин яъни бундай ўқлар узоқ йиллар давомида портламаслиги мумкин ва кейинчалик ундан тинч аҳоли жабрланади.
Ушбу турдаги қуролдан фойдаланиш 2010 йилда кучга кирган Кассетали ўқлар тўғрисидаги конвенсия билан тақиқланган. Унга 123 та давлат имзо чеккан. Шу билан бирга, АҚШ, Украина ва ҳатто Россия унинг иштирокчиси ҳисобланмайди.
Қўшма Штатлар кассетали ўқ-дорилардан фойдаланишни 2016 йилдан бошлаб тўхтатган. Хабарларга кўра, ҳозирда Россия Украинадаги урушда ушбу турдаги қуроллардан фаол фойдаланмоқда.
Ўзбекистонда парламентаризмнинг кучайиши
Бугун Олий Мажлис Қонунчилик палатасида ўзини ўзи бошқариш органлари қўмиталарининг қўшма йиғилиши бўлиб ўтмоқда
Йиғилишда таъкидланишича, аҳолидан келиб тушган таклифларнинг 18 мингтаси айнан парламентни ислоҳ қилиш билан боғлиқ.
Айтилишича, Ўзбекистонда парламентаризм ва халқ ҳокимиятчилигини кучайтиришга қаратилган бир қатор нормалар лойиҳага киритилмоқда.
Шунингдек, парламент фаолияти билан боғлиқ конституциявий ислоҳотларни амалга оширишда Олий Мажлис палаталарининг биргаликдаги ваколатлари қайта кўриб чиқилган. Бунда Қонунчилик палатаси билан Сенатнинг биргаликдаги ваколатлари ҳамда ҳар бир палатанинг алоҳида-алоҳида ваколатлари ва масъулият соҳалари аниқ белгиланди. Яъни Қонунчилик палатасининг мутлақ ваколатлари 5 тадан 12 тага, Сенатники эса 14 тадан 18 тага кўпайтириляпти.
“Бу иккала палатанинг мазкур йўналишдаги самарали ҳамкорлигини таъминлаган ҳолда коррупцияга қарши курашиш борасида ижобий ўзгаришлар учун замин яратади”, — дейилади хабарда.
Ваколатларнинг амалдаги ижросини кузатамиз
Изоҳ (0)