Россиянинг “Росатом” давлат корпорацияси Қозоғистонда биринчи атом электр станциясини қуриш бўйича халқаро консорсиум етакчиси деб топилди. Бу ҳақда Қозоғистон Атом энергияси агентлиги хабар берди.
Мамлакат ўзининг биринчи атом электр станциясини қуриш учун ҳамкор танлашни якунлади. Музокаралар очиқ ва рақобатбардош мулоқот усулида реактор технологияларининг тўртта етказиб берувчиси — “Росатом” (Россия), CNNC (Хитой), EDF (Франция) ва КҲНП (Жанубий Корея) билан олиб борилган.
Ҳар бир компания материалларнинг тўлиқ тўпламини — тахминий нарх ва амалга ошириш муддатларидан тортиб маҳаллийлаштириш, кадрлар тайёрлаш ва ядро-ёқилғи циклида иштирок этиш сценарийларигача тақдим этган.
Идоралараро комиссия барча аризаларни интеграциялашган баҳолашни кўриб чиқиб, “Росатом” таклифларини Қозоғистон учун энг мақбул ва фойдали деб топган. CNNC таклифи иккинчи ўринни, EDF ва КҲНП таклифлари учинчи ўринни эгаллади.
Атом энергияси агентлиги раиси Алмасадам Саткалиевнинг айтишича, Қозоғистон Хитой билан алоҳида – иккинчи АЭСни қуриш бўйича ҳамкорлик қилмоқчи. Бу борада Хитой томони билан алоҳида музокаралар ўтказилади.
Ўзбекистонда апрель ойида “Росатом” ишлаб чиққан Россия технологияси асосида кичик АЭС учун илк ишлаб чиқариш биноларини қуриш бошланди. “Росатом” раҳбари Қирғизистонда ҳам кичик қувватли атом станцияси қуришга тайёрлигини билдирган.
Қозоғистонда биринчи АЭС
Қозоғистондаги биринчи атом электр станцияси Олмаота вилоятининг Жамбил туманида қурилади. Бу ҳақда Республика ҳукуматининг тегишли қарори кучга кирган. Мамлакатда АЭС қурилиши жойи тўғрисидаги қарор 2024 йил 30 декабрда қабул қилинган. У 25 февраль куни расман эълон қилинди. 2024 йил 6 октябрда Қозоғистонда АЭС қурилиши бўйича референдум ўтказилди. Қозоғистонликларнинг 71,12 фоизи қурилишни қўллаб-қувватлади. Қосим-Жўмарт Тўқаев мамлакатда АЭС қурилишини жадаллаштириш бўйича кўрсатма берди. Энергетика вазирлиги мамлакатга камида учта АЭС зарурлигини таъкидлаган.
Изоҳ (0)