Ижтимоий тармоқларда Зоминда чигиртка шунчалик кўпки, одам устигача чиқиб кетяпти, мазмунида видео тарқалди. Қишлоқ хўжалиги вазирлиги ҳузуридаги Ўсимликлар карантини ва ҳимояси агентлиги ҳолатга изоҳ берди.
Унда айтилишича, ижтимоий тармоқларда тарқалаётган мазкур ҳолат 11 июнь куни тасвирга олинган. Жиззах вилоятининг Зомин туманида Карантин агентлигининг Чигиртка ва тут парвонасига қарши кураш хизмати механизатори Ҳайдар Мусаев кимёвий ишлов олиб борилишидан олдин маҳалла аҳолисига тушунтириш ишларини олиб борган.
Айни вақтда ҳудуд зарарсизлантирилиб, чигирткалар тўдаси бартараф этилган.
Билдирилишича, жорий йилда 608 минг гектар майдонда кимёвий ишлов олиб борилиши режалаштирилган бўлиб, шундан 99 300 гектар Жиззах вилоятида ўтказилиши айтилган. Ҳар куни республика бўйича тахминан 7-8 минг гектарда кимёвий ишлов ўтказилмоқда.
Қайд этилишича, вазият назорат остида. Мавсум бошидан буён 1000 дан ортиқ техника, 650 нафардан ортиқ ишчи ходим жалб этилиб, кураш тадбирлари давом этмоқда.
Қозоғистон, Ўзбекистон ва Қирғизистон чигирткаларга қарши курашиш бўйича кучларни бирлаштириб, минтақавий хавфсизликни таъминлаш йўлида ҳамкорликни йўлга қўймоқда.
Ўзбекистонда 2025 йилда 608 минг гектар майдонда чигиртка тарқалиши прогноз қилинган. Бироқ иқлим ўзгариши, йил сайин ҳаво ҳароратининг ошиб бораётгани зарарли чигирткалар майдони кенгайишига олиб келиши мумкин. Чигиртка босқини билан боғлиқ барча мурожаатларни ўз вақтида бартараф этиш мақсадида ҳудудларда тезкор штаблар ташкил этилиб, чигиртка хизмати 24/7 режимига ўтказилган.
Изоҳ (0)