Тошкент шаҳрида “Ўзбекистон—Швеция: онкологик ёрдам соҳасида ҳамкорлик ва тажриба алмашиш” мавзусида давра суҳбати бўлиб ўтди, деб хабар бермоқда “Дунё” ахборот агентлиги.
IV Халқаро фармацевтика форуми доирасида гибрид форматда ўтказилган тадбир Ўзбекистоннинг Швециядаги элчихонаси ва Тошкентдаги Швеция Савдо ва инвестисиялар кенгаши (Business Сwеден) ҳамкорлигида ташкил этилди.
Унда икки мамлакатнинг етакчи эксперт ва мутахассислари, жумладан, Ўзбекистон Соғлиқни сақлаш вазирлиги, “Ўзфармсаноат” уюшмаси, Каролина институти, Швеция дори-дармон агентлиги, AstraZeneca, Vision Зеро Cancer ва бошқа компаниялар мутасаддилари иштирок этди. Тадбир доирасида икки мамлакат соғлиқни сақлаш ва фармацевтика тизимларини ривожлантириш учун яратилган имкониятлар бўйича тақдимот ўтказилди.
Муҳокамаларда онкология ва фармацевтика соҳасидаги ҳамкорлик истиқболлари, янги лойиҳаларни ишлаб чиқиш, тажриба алмашиш ва қўшма тадқиқотлар ўтказиш масалалари кўриб чиқилди. Шунингдек, эрта ташхис қўйиш, даволашнинг инновацион усулларини жорий этиш, скрининг тизимини ривожлантириш ва онкологик ёрдам сифатини ошириш масалаларига эътибор қаратилди.
Ташкилотчиларга кўра, мазкур давра суҳбати тиббиёт соҳасида Ўзбекистон—Швеция ҳамкорлигини мустаҳкамлаш ва онкологик касалликларга чалинган беморлар учун тиббий ёрдам кўрсатиш сифатини яхшилаш йўлидаги муҳим қадам бўлди.
Май ойининг охирларида Қозоғистон ва Ўзбекистон биргаликда болалар саратони бўйича академик марказ ташкил қилиши хабар қилинганди. Икки давлат соғлиқни сақлаш вазирлари тиббий хизматлар сифатини ошириш, тиббий ёрдам кўрсатишда тажриба алмашиш, бирламчи тиббий-санитария ёрдами бўйича мамлакатлар коалицияси доирасида ўзаро ҳамкорлик, шунингдек, Оролбўйи аҳолиси саломатлигига таъсир этувчи экологик омилларни комплекс ўрганишга қаратилган қўшма илмий лойиҳаларни муҳокама қилганди.
“Ўзбекистон-2030” стратегиясида онкологик касалликлар сабабли эрта ўлимни 2,5 баробарга қисқартириш вазифаси белгиланган.
Изоҳ (0)