Qozog‘istondagi birinchi atom elektr stansiyasi (AES) Olmaota viloyatining Jambil tumanida quriladi. Respublika hukumatining tegishli qarori kuchga kirdi. Bu haqda Tengrinews xabar berdi.
Qozog‘iston hukumati qaror qiladi: Atom elektr stansiyasi yadroviy qurilmasi quriladigan hudud sifatida Olmaota viloyatining Jambil tumani belgilansin, deyiladi hujjatda.
Respublikada AES qurilishi joyi to‘g‘risidagi qaror 2024-yil 30-dekabrda qabul qilingan. U 25-fevral kuni rasman e’lon qilindi. Ilgari prezident Qosim-Jo‘mart To‘qayev mamlakatda AES qurilishini jadallashtirish bo‘yicha ko‘rsatma bergan edi. Energetika vazirligi esa mamlakatga kamida uchta AES zarurligini ta’kidlagan.
2024-yil 6-oktyabrda Qozog‘istonda AES qurilishi bo‘yicha referendum o‘tkazildi. Qozog‘istonliklarning 71,12 foizi qurilishni qo‘llab-quvvatladi. Saylovchilarning ovoz berishda ishtirok etish darajasi 63,66 foizni tashkil etdi.
Qozog‘iston AES qurilishi uchun potensial texnologiya yetkazib beruvchilar bilan raqobatbardosh muloqotni yakunlagan. Energetika vazirligi Qozog‘istondagi birinchi atom elektr stansiyasi 8 yil ichida qurilishi mumkinligini ta’kidladi.
Izoh (0)