2025 йил 10 июнь куни Ўзбекистон пойтахтида IV Тошкент халқаро инвестицион форуми иш бошлади. Бу ҳақда “Дарё” мухбири хабар берди.
Форум Инвестициялар, саноат ва савдо вазирлиги томонидан ташкил этилди. Унда қиймати 30 миллиард доллардан ортиқ энергетика, инфратузилма, қишлоқ хўжалиги, фойдали қазилмаларни қазиб олиш, рақамли технологиялар ва бошқа соҳаларга оид инвестицион лойиҳалар тақдим этилмоқда.
Тадбир халқаро инвесторлар, ҳукуматлар, молия институтлари ва бизнес вакилларидан иборат 8 мингдан зиёд иштирокчини қамраб олди. Жумладан, Тошкент шаҳрига дунёнинг 100 га яқин мамлакатидан 3 мингга яқин хорижий меҳмон келди. Болгария президенти Румен Радев, Словакия бош вазири Роберт Фисо, Қозоғистон бош вазири Ўлжас Бектенов, Қирғизистон вазирлар кенгаши раиси Адилбек Қосималиев, Тожикистон бош вазири Қоҳир Расулзода, Озарбайжон бош вазири Али Асадов шулар жумласидан.
Бу гал аввалгиларидан фарқли равишда Ўзбекистон саноати ва инвестиция салоҳиятини кўрсатувчи илк Миллий кўргазма очилди. Ўндан ортиқ соҳалар бўйича 90 та компания ўз маҳсулотларини тақдим этяпти.
Кўргазма инвесторларга Ўзбекистондаги мавжуд имкониятлар ва ҳамкорликка тайёр лойиҳалар ҳақида тўлиқ тасаввур ҳосил қилишга ёрдам беради.
Форумда 12 июнгача давом этади. Мазкур давр панел муҳокамалари, лойиҳалар тақдимотлари, икки томонлама учрашувлар ҳамда Ўзбекистоннинг халқаро ҳамжамият билан инвестициявий шериклигини янада мустаҳкамлашга қаратилган битимларни имзолашни ўз ичига олади.
Изоҳ (0)