Японияда 2017 йилда тўққиз кишини ўлдирган эркак қатл этилди. Бу мамлакатда 2022 йилдан бери амалга оширилган илк ўлим жазоси ҳисобланади. Бу ҳақда BBC хабар берди.
“Twitter қотили” номи билан танилган Такаҳиро Шираиши томонидан содир этилган кетма-кет қотилликлар бутун Японияни ларзага солганди. Ўша пайтда 30 ёшли Шираиши ижтимоий тармоқ орқали танишган, асосан 15 ёшдан 26 ёшгача бўлган ёш аёлларни алдов йўли билан квартирасига олиб бориб, уларни бўғиб ўлдирган ва жасадларини бўлакларга ажратган.
Қотилликлар 2017 йил октябрь ойида фош бўлган. Ўшанда полиция Токио яқинидаги Зама шаҳрида қурбонлардан бирини қидираётганда, жасад бўлакларини топган. Шираиши кейинчалик ўз жонига қасд қилишни истаган тўққиз кишини ўлдирганини тан олган. Улар билан Twitter (ҳозирда Х) орқали танишгани маълум бўлган. У қурбонларга ўлишларига ёрдам бериши мумкинлигини айтган ва баъзи ҳолларда улар билан бирга ўзини ҳам ўлдирмоқчи эканини билдирган.
Ҳақиқатан ҳам азоб чекаётган одамларга ёрдам бермоқчиман. Исталган вақтда менга шахсий хабар ёзинг, деб ёзилган унинг Twitter профилида.
Полиция Шираишининг уйига борганида, у ерда музлаткичлар ва асбоб-ускуналар учун мўлжалланган қутиларида тўққиз кишининг жасад қисмлари топилган. Прокурорлар Шираиши учун ўлим жазосини сўраган. Бироқ унинг адвокатлари қурбонлар “ўз розилиги билан ўлдирилган” деб, жазони енгиллаштиришга ҳаракат қилган ва Шираишининг руҳий ҳолатини баҳолашни сўраган.
Аммо Шираиши ўз адвокатларининг даъволарига қарши чиқиб, одамларни уларнинг розилигисиз ўлдирганини тан олган. 2020 йил декабрь ойида у ўлим жазосига ҳукм қилинганда юзлаб одамлар суд мажлисини кузатган. Бу қотилликлар Twitterънинг сиёсатини ҳам ўзгартиришга сабаб бўлган. Эндиликда платформа фойдаланувчиларга “ўз жонига қасд қилиш ёки ўзига зарар етказишни тарғиб қилиш ёки рағбатлантириш”ни қатъиян тақиқлайди.
Изоҳ (0)