Корейс, япон, хитой миллатига мансуб актёрлар ўзига хос тиришқоқлик билан юлдузли Олимпнинг энг юқори чўққиларини эгаллайди. Голливуд кинематографиясида машҳурликка эришган осиёлик юлдузлар талайгина. Марҳамат, улар билан танишинг.
Жеки Чан − Хитой
Чан Конг Санг Гонконг мактабида жанг санъати, актёрлик ва акробатика бўйича таълим олган. У илк бора 8 ёшида фильмга таклиф қилинган. Ўқишни тамомлагандан сўнг Жеки Чан тахаллуси билан киноларда каскадёр бўлиб ишлаган, кейинчалик актёр ўзининг каскадёрлик гуруҳини ҳам ташкил қилган. Ўтган асрнинг 70 йилларида эса бош қаҳрамон сифатида рол ижро эта бошлади. Шунингдек, режиссёрлар унинг барча трюкларни ўзи амалга ошириши борасидаги истагидан ҳайратда қолди ва бу актёрга бўлган талабни кучайтирди. Бундан ташқари, фильмни суратга олишда муваффақиятсиз кечган кадрларни фильмнинг охирига қўшиш ғоясини ҳам актёр таклиф қилди ва бу кутилганидан ҳам кўра кўпроқ томошабин йиғишга сазовор бўлди.
2000 йилда Чан болалар учун “Жеки Чаннинг саргузаштлари” мультфильмини яратди ва 5 мавсум давомида ёш мухлисларнинг саволларига жавоб берди. Осиёда Чан нафақат ўзининг кино ютуқлари, балки мусиқий ижоди билан ҳам танилган. Унинг 20 та мусиқий альбоми мавжуд.
Жон Чо – Жанубий Корея
Жон Чо Сеулда туғилган, аммо ҳали ватан тушунчасини англаб етмасиданоқ, 6 ёшида оиласи билан Лос-Анжелесга кўчиб кетган. Орадан кўп ўтмай у юлдузлик карьерасини орзу қила бошлаган. Инглиз тили ва адабиёти факультетининг талабаси сифатида Жон университет спектаклларида иштирок этган ва кейинчалик “Осиё Америка” театр труппасига қўшилган.
Чо ўзининг илк дебютини 1999 йилда “Американча пирог” комедиясида ижро этди. 2009 йилда Чо яна бир йирик лойиҳа – “Юлдузли йўл”нинг аъзоси бўлди. Актёрнинг бир нечта фильмларда иштирок этиши унинг машҳурлигини орттирди. У бўш вақтларида Viva Ла Унион гуруҳида қўшиқ куйлайди.
Кен Жонг – АҚШ
Кен Жонг Шимолий Каролинада корейс муҳожирлари оиласида туғилган. У ёшлигида актёр бўлиш ҳақида ўйлаб ҳам кўрмаган. Шимолий Каролина университетида тиббиёт даражасини олиб, амалиётга боради. Ўқиш давомида Кен ўзининг комик истеъдодини намоён қилди. Унинг актёрлик фаолияти 2000 йилларда бошланди. Фаолияти сабабли Калифорнияга кўчиб ўтган актёр тез орада машҳурликка эришди.
Кен Ватанабе – Япония
Кен Токиодаги Британия театр мактабида ўқиган ва талабалик чоғида актёрлик фаолиятини бошлаган. Режиссёрлар актёрнинг ғайриоддий кўриниши ва самурайга айланиш қобилиятини алоҳида таъкидлайди. “Сўнгги самурай” фильми режиссёри Эдвард Свик актёр ҳақида ҳазиллашиб, ҳатто Ватанабенинг қўлидаги ошхона пичоғи ҳам жангчининг ханжарига айланади, дейди.
Суратга олиш майдонидаги ҳамкасблари Ватанабени нафақат унинг истеъдоди, балки камтарин характери ва юлдузлик касалига йўлиқмаганлиги учун қадрлайди.
Жет Ли – Хитой
Ли Лянсизе мактабда жисмоний тарбия соҳасида муваффақият қозонган ва ҳатто ўқитувчиларга ҳам спорт машғулотларини ўтказишда ёрдам берган. Биринчи синфни тамомлаганида унинг ота-онаси оромгоҳга жўнатган. Айнан ўша ерда у ушу асосларини ўрганиб қайтади. Уйга қайтганидан сўнг жанг санъати билан профессионал тарзда шуғулланишга қарор қилган ва 9 ёшидаёқ Жет Хитойда ушу бўйича миллий чемпионатда ғолиб чиқади. Орадан икки йил ўтиб у Америкадаги турнирга йўл олади.
1998 йил актёр Америкага спортчи сифатида эмас, актёр бўлиб боради. Шунингдек, актёр ўз карьерасини бошлагандан сўнг Жет Ли тахаллусини олган.
Чоу Юнфат, Гонконг
Актёр “Ёлланма қотил”, “Анна ва қирол”, “Ёрқин келажак” ҳамда “Кариб денгизи қароқчилари: Дунёлар чегарасида” фильмларидаги образлари билан машҳур.
Чоу Юнфатнинг болалиги йўқчиликда ўтган. Унинг ота-онаси фермерчилик билан шуғулланиб, зўрға рўзғор тебратарди. Юнфат қўлидан иш келиб қолганида мактабдаги ўқишни ташлаб, ота-онасига ёрдам бера бошлади.
У почтачи, курер ва ҳайдовчи бўлиб ишлаб, пул топарди. Кейинроқ у яхшироқ пул топпиш мақсадида Тв-шоулардан бирига кастингга борган. Кўрсатув сёмкаси ёш йигитга шунчалик ёқиб қоладики, у театр мактабига кириб, унда ўқишга қарор қилади ҳамда қизиқарли лойиҳаларни излай бошлайди.
Чоу “Шанхай соҳили” сериалидаги ижросидан сўнг ўз ватанида машҳурликка эришган. Ушбу лойиҳа Осиёдаги энг йирик cриминал шоулардан бирига айланди. Телевидениедан сўнг актёр катта кинога қадам қўяди. 1986 йилда у “Ёрқин келажак” жангари фильмида мафия бошлиғи ролига тасдиқланган. Ушбу роли учун у Гонконг кино санъати академиясининг мукофотини қўлга киритган.
Чоунинг таърифи Голливудгача етиб, у актриса Жоди Фостер билан биргаликда “Анна ва қирол” фильмида суратга тушади.
Шу тариқа Юнфатнинг карьераси икки йўналишда ривожлана бошлади. У ҳозирда осиёлик режиссёрлар ва америкалик ижодкорларнинг лойиҳаларида суратга тушиб келмоқда.
Ли Бёнхон, Жанубий Корея
“Илон ҳамласи”, “Терминатор: Генезис” ҳамда “Ёнғондан ёмонроқ” каби фильмлари билан машҳурликка эришган актёр ҳар доим сценарийларни диққат билан ўқийди. У ўзига таклиф этилаётган лойиҳаларни синчковлик билан ўрганади. Шунинг учун унинг биронта лойиҳаси томошабинлар эътиборидан четда қолмайди.
Бёнхон иштирокидаги “Ширин-аччиқ ҳаёт” фильми Япония ва Европа танқидчиларига манзур бўлган. “Яхши, ёмон ва ақлдан озган” фильми эса Канн кинофестивалида намойиш этилган. “Айрис” cриминал драмасидаги иштироки эса актёрга KBS Драма Awards тақдимот маросимида “Энг яхши актёр” эътирофини олиб келди.
Бёнхон актёрлик маҳоратидан ташқари француз, инглиз тилларини мукаммал билади. У 2005 йилда Американинг Creative Артисц Agency агентлиги билан шартнома имзолаган. Ушбу агентлик актёрга “Илон ҳамласи” фильмида рол ижро этишига ёрдам берган.
Кинодаги ролларидан ташқари Ли мусиқий альбомлар ёзади ҳамда BH Entertainment кинокомпаниясига раҳбарлик қилади.
Изоҳ (0)