Ўтган ҳафта суиқасд оқибатида ҳалок бўлган Япония собиқ бош вазири Синдзо Абэ ўлимидан кейин Япониянинг энг фахрий давлат мукофоти — Хризантема олий ордени билан тақдирланади, деб ёзади «РБК».
Kyodo нашри маълумотларига кўра, қарор мамлакат вазирлар маҳкамаси мажлисида қабул қилинган. Абэга занжирли Хризантема олий ордени берилади — Японияда бундай орден билан фақат вафотидан кейин мукофотланади.
Хризантема олий ордени 1876 йилда император Мэйдзи томонидан таъсис этилган. Шундан буён у билан Япониянинг барча императорлари мукофотланиб келган.
Шунингдек, орден чет эл қироллик оиласи аъзолари ва хорижлик сиёсий арбобларга ҳам берилган. Орден кавалерлари орасида АҚШ собиқ президенти Рональд Рейган, Британия шаҳзодаси Чарльз, шунингдек, Украина собиқ президенти Виктор Янукович бор.
Синдзо Абэ 8 июль куни ўлдирилди. Қотил у Нара шаҳрида Либерал-демократик партияни қўллаб-қувватлаб нутқ сўзлаётган пайтда уни орқадан нишонга олди. Шифокорлар сўзларига кўра, сиёсатчи бўйнининг ўнг қисмидан, шунингдек, юрагидан яраланган. Бир неча соатдан кейин у касалхонада вафот этган.
Ҳужумда гумонланувчи 41 ёшли Тэцуя Ямагами воқеа жойида полиция томонидан қўлга олинди, ундан қўлбола қуроли мусодара қилинди. У қаршилик кўрсатмади ва кейинроқ ўз қилмишига иқрор бўлди. Унинг сўзларига кўра, Абэ «аллақандай гуруҳ» аъзоси бўлган, у эса ушбу гуруҳга нафрат туйғусини ҳис қилган ва шу сабабли собиқ бош вазирга ҳужум қилишга қарор қилган. Сўроқ чоғида Ямагами аниқлик киритишича, унинг онаси ушбу гуруҳга аралашиб қолган ва пулларини унга хайрия қилган, шундан кейин оиладаги муносабатлар бузилган. Аввалроқ эса у Абэнинг сиёсатидан норози бўлгани туфайли, уни ўлдиришга қарор қилганини айтганди.
Изоҳ (0)