Дональд Трамп Кентукки штатидан АҚШ Конгресси Вакиллар палатаси аъзоси Томас Массининг АҚШнинг Эрон ядро инфратузилмасига берган зарбаларини қоралаган танқидига кескин муносабат билдириб, уни “дайди” деб атади. Бу ҳақда Америка раҳбари ўзи Truth Social ижтимоий тармоғида маълум қилди.
“Бу дайдини зудлик билан Конгрессдан ҳайдаб чиқариш керак!”, дейди Трамп
Шунингдек, Трампнинг таъкидлашича, Масси MAGA (Make America Great Again) ҳаракатига алоқадор эмас ва ўзини фақат унинг тарафдори деб атайди, холос.
АҚШ президентининг сўзларига кўра, конгрессмен ватанпарварлик сиёсатига тўсқинлик қилиб, Трамп таъкидлаганидек, “ҳар қулай фурсатда “Америкага ўлим” деб бақираётган” Эрон манфаатларини ҳимоя қилмоқда.
Бундан аввал Лос Анжелес округи шерифи Х ижтимоий тармоғида АҚШ ҳужуми муносабати билан Эронга ҳамдардлик билдирган, кейинчалик эса постни ўчириб ташлагани хабар қилинганди.
22 июнга ўтар кечаси Америка раҳбари Дональд Трамп АҚШ ҳарбий-ҳаво кучлари Эроннинг учта ядровий объектига ҳужум қилганини маълум қилди. Асосий нишон Фордо — уранни бойитиш заводи бўлди. Трампнинг айтишича, Эроннинг уранни бойитиш бўйича асосий объектлари “бутунлай ва тўлиқ йўқ қилинган”. Эрон эса Фордо заводига фақат қисман зарар етганини таъкидламоқда.
Изоҳ (0)