Donald Tramp Kentukki shtatidan AQSH Kongressi Vakillar palatasi a’zosi Tomas Massining AQSHning Eron yadro infratuzilmasiga bergan zarbalarini qoralagan tanqidiga keskin munosabat bildirib, uni “daydi” deb atadi. Bu haqda Amerika rahbari o‘zi Truth Social ijtimoiy tarmog‘ida ma’lum qildi.
“Bu daydini zudlik bilan Kongressdan haydab chiqarish kerak!”, deydi Tramp
Shuningdek, Trampning ta’kidlashicha, Massi MAGA (Make America Great Again) harakatiga aloqador emas va o‘zini faqat uning tarafdori deb ataydi, xolos.
AQSH prezidentining so‘zlariga ko‘ra, kongressmen vatanparvarlik siyosatiga to‘sqinlik qilib, Tramp ta’kidlaganidek, “har qulay fursatda “Amerikaga o‘lim” deb baqirayotgan” Eron manfaatlarini himoya qilmoqda.
Bundan avval Los Anjeles okrugi sherifi X ijtimoiy tarmog‘ida AQSH hujumi munosabati bilan Eronga hamdardlik bildirgan, keyinchalik esa postni o‘chirib tashlagani xabar qilingandi.
22-iyunga o‘tar kechasi Amerika rahbari Donald Tramp AQSH harbiy-havo kuchlari Eronning uchta yadroviy obyektiga hujum qilganini ma’lum qildi. Asosiy nishon Fordo — uranni boyitish zavodi bo‘ldi. Trampning aytishicha, Eronning uranni boyitish bo‘yicha asosiy obyektlari “butunlay va to‘liq yo‘q qilingan”. Eron esa Fordo zavodiga faqat qisman zarar yetganini ta’kidlamoqda.
Izoh (0)