АҚШ президенти Дональд Трамп россиялик ҳамкасби Владимир Путин билан 4 июнь куни телефон орқали мулоқот қилди. Суҳбатда томонлар Украинанинг “Ўргимчак тўри” номи остида Россия ҳарбий аэродромларига қилган операциясини ҳам муҳокама қилди.
Суҳбат давомида Путин Украинада яқин орада тинчлик бўлишини кутмаслик кераклигини билдирган. Шунингдек, у Москва аэродромларига уюштирилган ҳужумга жавоб қайтарилишини таъкидлаган.
Мен ҳозиргина Россия президенти Владимир Путин билан телефон орқали суҳбатни якунладим. Суҳбат, тахминан, бир соат-у 15 дақиқа давом этди. Биз Украинанинг Россия самолётларига ҳужумини, шунингдек, ҳар икки томондан содир бўлаётган бошқа турли ҳужумларни муҳокама қилдик.
Бу яхши суҳбат бўлди, лекин дарҳол тинчликка олиб келадиган суҳбат эмас. Президент Путин яқинда аэродромларга қилинган ҳужумга жавоб қайтариши кераклигини жуда қатъият билан айтди, деди АҚШ раҳбари.
Украина мавзусидан ташқари, Эрон масаласи ҳам муҳокама қилинган. Трампнинг сўзларига кўра, у Путинга Теҳрон ядро қуролига эга бўлмаслиги кераклигини айтган.
Биз Эрон ҳақида ҳам, Эроннинг ядро қурол бўйича қарор қабул қилиш муддати тугаётгани ва бу қарор тезда қабул қилиниши кераклиги ҳақида ҳам гаплашдик! Мен президент Путинга Эронда ядро қуроли бўлиши мумкин эмаслигини айтдим ва бу борада, ўйлайманки, биз ҳамфикр эдик. Путин Эрон билан музокараларда иштирок этиши ва уларни тезроқ якунлашда фойдали бўлиши мумкинлигини тахмин қилди, деган Трамп.
“Ўргимчак тўри” операцияси
Украина Хавфсизлик хизмати 1 июнь куни Россиянинг бешта авиация базаларига қарши кенг кўламли махсус операция ўтказди. Унинг мақсади Россия стратегик авиациясини, хусусан, Украина шаҳарларига мунтазам равишда ҳужум қилган қанотли ракета ташувчиларини ишдан чиқариш эди.
Операция бир ярим йилдан кўпроқ вақт давомида тайёрланган ва пухта режалаштирилган. Ҳужумлар Россияда тўхтаб турган юк машиналаридан учиб чиққан дронлар ёрдамида амалга оширилган. Бу эса Украина чегарасидан узоқ масофада зарбалар беришга имкон берган.
АҚШ разведкаси маълумотларига кўра, етказилган зарар “сезиларли” бўлган, бироқ унинг кўлами ҳали баҳоланмоқда Оқ уйдаги манбалар ҳужумлар натижасида Россия камида олтита узоқ масофали Ту-95, камида тўртта Ту-22М бомбардимончи самолётларини, шунингдек, ҳар бири 300 миллион доллар қийматидаги бир нечта А-50 радиолокацион назорат самолётларини йўқотганини маълум қилган.
Ғарб экспертлари фикрича, бу операция урушда бурилиш нуқтаси бўлиши мумкин ва Украинанинг Россиянинг стратегик объектларига зарба бериш қобилиятини намойиш этади. Операцияга 117 та дрон жалб қилинган. Улар Россиянинг стратегик қанотли ракета ташувчиларининг 34 фоизини йўқ қилган.
Зеленский операциянинг “офиси” Россия вилоятларидан бирида Федерал хавфсизлик хизмати бошқармаси ёнида жойлашганини айтган. Украина президенти “ноёб операция” учун хавфсизлик хизмати ходимларига миннатдорлик билдирган.
Изоҳ (0)