Хитой электр станцияларини ишдан чиқариб, электр таъминотини тўлиқ узиб қўйишга қодир қуролни яратди. Унинг анимацион видеоси давлат телеканалида намойиш қилинди. Бу ҳақда South China Morning Post хабар берди.
Бу қурол душманнинг бошқарув ва назорат тизимларини ишдан чиқариб, камида 10 минг квадрат метр майдонда кенг кўламли электр узилишларини келтириб чиқариши мумкин. Қуролнинг номи ёки аниқ тури ошкор этилмаган. У акс этган видеода қурол “мамлакатда ишлаб чиқарилган сирли ракета тури” деб аталган.
Экспертлар бу графит бомбаси ёки ракетаси бўлиши мумкинлигини тахмин қилмоқда. У ривожланишнинг қайси босқичига етгани ёки Хитой ҳарбийлари томонидан қўллангани номаълумлигича қолмоқда.
Видеода қурол ерда жойлашган транспорт воситасидан учирилиши акс этган. Шундан сўнг у ҳавода 90 та цилиндрсимон кичик контейнерларни чиқаради. Улар ерга тушгач сакраб, ҳавода портлайди. Бу контейнерлар ингичка углерод толаларини тарқатиб, портлайди ва энергия инфратузилмаси тармоқларида қисқа туташувни юзага келтиради.
Видеодаги маълумотларга кўра, қуролнинг таъсир масофаси 290 километр, зарядининг оғирлиги эса 490 килограммни ташкил этади. Ҳозирча Хитой армиясининг қурол-яроғларидаги графит тизимлари ҳақида жуда оз маълумот мавжуд.
Изоҳ (0)