ChatGPT суҳбат тизими ишга туширилганидан сўнг британиялик битирувчилар ва амалиётчилар учун бўш иш ўринлари сони камида 31,9 фоизга қисқарган. Бу ҳақда The Guardian нашри маълум қилмоқда.
Талаб пасайгани ҳақидаги маълумотларни Adzuna иш қидириш платформаси тақдим этган.
Таъкидлашича, сунъий интеллектдан кенг фойдаланиш компанияларга иш самарадорлигини ошириш ва ходимлар сонини камайтириш имконини берган. Натижада тажрибасиз мутахассислар учун иш топиш тобора қийинлашиб бормоқда.
Хусусан, бизнес жараёнларини оптималлаштириш муносабати билан Буюк Британия ва Европанинг йирик телекоммуникация компанияларидан бири — British Telecommunications 2023 йилда 40-50 минг ходимни қисқартириш режасини эълон қилди.
Яқинда Массачусетс технология институти америкалик олимлари тил моделларидан фойдаланиш ва когнитив функцияларнинг пасайиши ўртасида ташвишли боғлиқлик мавжудлигини аниқладилар. Тажриба давомида ChatGPT ёрдамида иншо ёзган иштирокчилар мустақил ишлаганларга қараганда анча паст мия фаоллигини намоён этдилар.
Бундан аввал Буюк Британиянинг Чешир полицияси қоидабузарликни аниқлашда сунъий интеллектдан фойдаланишни бошлаган мамлакатдаги биринчи орган бўлганди.
Изоҳ (0)