Англия футбол клуби “Манчестер Сити” Ўзбекистондан яна бир футболчисини харид қилади. Бундан ташқари, клубга эгалик қилувчи “City Football Group” ҳолдинг Ўзбекистон клубини сотиб олади. Бу ҳақда “Матбуот ва оммавий ахборот воситалари куни” муносабати билан Марказий Олимпия Қўмитасида (МОҚ) ўтказилган тадбирда сўзга чиққан қўмита раисининг биринчи ўринбосари Отабек Умаров маълум қилди.
Унинг сўзларига кўра, Абдуқодир Ҳусановнинг трансфери ортидан ўзбек футболига қизиқиш ошган ва айни пайтда “City Football Group” клубларидан бирини ўз таркибига қўшиш бўйича музокаралар олиб борилмоқда.
Футболчимиз Абдуқодир Ҳусанов “Манчестер Сити”га ўтганидан кейин унинг мухлислари 100 миллионтага кўпайди. Бу эса шуни англатадики, Ўзбекистонда тахминан 37-38 миллион аҳоли бўлса, Ўрта Осиёнинг бошқа давлатлари ҳам айнан ушбу футболчи сабаб “Манчестер Сити” жамоасини доимий равишда кузатадиган мухлислар қаторига қўшилди. Ҳозир улар яна футболчимиз ва Ўзбекистоннинг яна бир жамоасини ҳолтинг таркибига қўшиб олишни режалаштирмоқда, деди МОҚ раисининг биринчи ўринбосари Отабек Умаров.
Маълумот учун, Мансур Ал Наҳаёнга тегишли “City Football Group” футбол ҳолдингига қуйидаги жамоалар киради: “Баиа” (Бразилия), “Ломмел” (Бельгия), “Нью-Йорк Сити” (АҚШ), “Мелбурн Сити” (Австралия), “Монтевидео Сити Торке” (Уругвай), “Жирона” (Испания), “Йокогама Маринос” (Япония), “Труа” (Франция), “Мумбай Сити” (Ҳиндистон), “Истанбул Башакшеҳир” (Туркия), “Манчестер Сити” (Англия) ва “Чичуан Жюню” (Хитой).
Шунингдек, ҳамкор клублар сифатида “Боливар” (Боливия) ва “Палермо” (Италия) жамоалари ҳам мавжуд.
Изоҳ (0)