Бразилиялик машҳур футболчи Неймар бу сафар майдондаги ўйини эмас, балки майдондан ташқаридаги навбатдаги ноодатий хариди билан омма эътиборини тортди. Футболчи суперқаҳрамонларга, айниқса, Бетменга бўлган қизиқиши билан танилган. Эндиликда у шахсий коллекциясига яна бир ноёб экспонат — Бетмобилнинг махсус нусхасини қўшиб қўйди.
Неймарнинг Бетмен образига бўлган қизиқиши мухлисларига яхши маълум. У бир неча бор суперқаҳрамон костюмида тадбирларда иштирок этган, ўзининг шахсий вертолётини Бетмен оламига хос тарзда безатган — у ерда Bat-signal логотипи, қора ранглар ва бошқа суперқаҳрамонга оид элементлар ишлатилган. Шунингдек, туғилган кунида унга Бетменнинг ҳайкалини совға қилишган. Эндиликда эса ҳужумчи махсус ишлаб чиқилган Tumbler русумидаги Бетмобили билан омма эътиборига тушди.
Уч йилга яқин меҳнат маҳсули
Ушбу машинанинг ишлаб чиқилиши устида машҳур бразилиялик дизайнер Адҳемар Кабрал ва унинг жамоаси уч йил давомида ишлаган. Улар машҳур “Қоронғи рицар” (“Тhe Dark Knight”) трилогиясидаги Бетмобил нусхасини иложи борича аслига яқин кўринишда ясашга ҳаракат қилишган. Машина тўлиқ қўлда ясалган бўлиб, ҳар бир детали эҳтиёткорлик билан йиғилган.
Мазкур ноёб автомобиль Неймар яшаётган Сантос шаҳрида топширилди. Унинг тақдимоти шаҳар аҳлида, автомобиль ишқибозлари ва коллексионерлар орасида катта қизиқиш уйғотди.
Техник имкониятлари ва чегаралари
Бетмобил кучли V8 двигатели билан жиҳозланган бўлиб, 450–500 от кучига эга. Аммо унинг ноодатий дизайни ва техник хусусиятлари туфайли бу машина оммавий йўлларда ҳаракатланиш учун рухсатга эга эмас. У фақат ёпиқ майдонларда ёки махсус тадбирларда намойиш этилиши мумкин.
Автомобилнинг яна бир ўзига хос жиҳати — орқа газ чиқариш тизимидан ҳақиқий олов чиқиши каби махсус эффектлар билан жиҳозлангани.
Бетменнинг ашаддий мухлиси
Неймар Бетменнинг ашаддий мухлиси ҳисобланади. У 2016 йилда актриса Бруна Маркезине билан бирга ўтказилган зиёфатда Бетмен ва Кошкакелин образида қатнашган, Бетмен логотипи туширилган футболкаларни кийган, ҳаттоки ўзининг шахсий вертолётига Bat-signal тасвирини туширтирган. Энг эътиборлиси эса — унга футболчи Мауро Икарди ва унинг рафиқаси Ванда Нара томонидан совға қилинган Бетмен ҳайкалидир.
Неймарнинг дизайнери: “У оддий коллекционер эмас”
Бетмобил лойиҳаси устида ишлаган дизайнер Адҳемар Кабрал Неймар билан аввал ҳам ишлаган — у футболчи учун махсус олтин қопламали кресло ва пойга симулятори ясаган. Кабралнинг айтишича, Бетмобил — унинг фаолиятидаги энг мураккаб ва шу билан бирга энг завқли лойиҳалардан бири бўлган.
Ҳар бир пайванд, ҳар бир винт, ҳар бир элемент эътибор билан ишлаб чиқилди. Неймар оддий коллекционер эмас. У Бетменнинг ҳақиқий мухлиси ва бу машина шуни акс эттириши керак эди.
Неймар коллекциясидаги ноёб дурдона
Неймар ўзининг ҳашаматли автомобилларга бўлган қизиқиши билан ҳам машҳур. Унинг гаражида дунёнинг етакчи брендлари ва шахсий буюртма асосида тайёрланган автомобиллар бор. Аммо Бетмобил ўзининг кино маданияти билан узвий боғлиқлиги ва рамзийлиги билан ушбу коллекцияда алоҳида ўрин эгаллайди.
Бу машина нафақат Неймарнинг бойлиги ва ноодатий дидини акс эттиради, балки унинг йиллар давомида шаклланган суперқаҳрамон оламига бўлган садоқатининг ҳам ёрқин намунаси ҳисобланади.
Изоҳ (0)