Бразилиялик ҳужумчи Неймар фаолиятини Туркия чемпионатида давом эттириши мумкин. Fanatik нашри хабарига кўра, “Фенербаҳче” 33 ёшли футболчига бир йиллик шартнома таклиф қилган, шунингдек, унда битимни яна бир йилга узайтириш имконияти ҳам кўзда тутилган.
Маълумотларга кўра, Неймарнинг “Сантос” билан тузилган шартномасида футболчига Европа клубларига бепул ўтиш ҳуқуқини берувчи банд мавжуд. Истанбул клуби айнан шундан фойдаланиб, уни жамоага таклиф қилмоқчи.
Инглиз журналисти Крис Антонининг хабар беришича, Неймарга нафақат “Фенербаҳче”, балки Европанинг бошқа клублари — Англиянинг “Астон Вилла” ҳамда Франциянинг “Марсель” клуби ҳам қизиқиш билдирмоқда. “Сантос” эса уни таркибда сақлаб қолиш мақсадида янги шартнома таклиф қилган.
Неймар 2025 йилнинг январь ойида Саудия Арабистонининг “Ал-Ҳилол” клубидан эркин агент мақомида “Сантос”га ўтган эди. У жорий мавсум барча мусобақалар доирасидаги 14 та ўйинда майдонга тушди, ўз ҳисобига 3 та гол ва 3 та голли узатма ёздириб қўйган. Унинг “Сантос” билан шартномаси жорий йилнинг июнь ойининг охиригача амал қилади. Transfermarkt портали ҳужумчининг қийматини 12 миллион еврога баҳолаган.
Эслатиб ўтамиз, аввалроқ ОАВда Неймарга Истанбулнинг бошқа клуби — “Галатасарой” ҳам қизиқиш билдиргани ҳақида хабарлар тарқалган эди. Шунингдек, футболчининг агенти уни Мюнхеннинг “Бавария” клубига таклиф қилгани борасида миш-мишлар тарқалганди.
Изоҳ (0)