АҚШнинг 42-президенти Билл Клинтон Россия биринчи президенти Борис Ельцин билан НАТОнинг кенгайиши ҳақидаги суҳбати тафсилотларини айтиб берди. Унинг сўзларига кўра, Ельцин НАТОнинг Россияга зарба беришига ишонмаган. Клинтон Россияга альянсга қўшилиш истиқболини таклиф қилганини яна бир бор эслади.
«Ундан ‘Мен Россияни бомбардимон қилиш учун Польшадаги Америка базасидан фойдаланаман, деб ўйлайсизми?’ дея сўрагандим», — эслади Клинтон CNN телеканалига берган интервьюсида. «У шундай жавоб берди: ‘Йўқ, лекин Россияда кўпчилик шундай деб ўйлайди, чунки уларнинг тарихий хотирасида Гитлер ва Наполеон қолиб кетган».
Клинтон буни тан олган, бироқ Россия ҳақидаги тарихий тасаввурлар рус давлати «ўз қўшниларини назорат қилган» Иван Грозний, Пётр I ва Екатрина II каби ҳукмдорлар даври билан боғлиқлигини таъкидлаган. Шу билан бирга Клинтон одамлар энди «уларни кимдир назорат қилишини» эмас, балки ўз йўлини ўзи танлашга интилаётгани ҳақида гапирган.
«Мен Россияга нафақат махсус ҳамкорликни, балки келажакда НАТОга аъзо бўлиш истиқболларини ҳам таклиф қилгандим», — деди Клинтон. Собиқ президентнинг тушунтиришича, ўша пайтда у «нодавлат ташкилотлар, авторитар давлатлар, шунингдек, кимёвий, биологик ёки ядровий қуролларнинг террорчи гуруҳлар қўлига тушиши келажакда хавфсизликнинг энг катта муаммолари бўлади» деб ҳисоблаган.
Билл Клинтон апрель ойида ҳам Россия президентлари Борис Ельцин ва Владимир Путинга НАТОга киришни таклиф қилгани ҳақида айтганди. Путин Украинадаги ҳарбий операция бошланишидан бироз олдин, Қўшма Штатлар 2000 йилда Россиянинг НАТОга кириши ғоясига «вазмин» муносабатда бўлганини маълум қилган.
Изоҳ (0)