АҚШ собиқ президенти Билл Клинтон Россиянинг Украинага ҳужуми фақат “вақт масаласи” бўлганини айтди. У буни 2011 йил Давосда Россия президенти Владимир Путин билан суҳбатда тушунганини айтди. Бу ҳақда Клинтон нутқига таяниб, Financial Times хабар берди.
Клинтоннинг сўзларига кўра, Владимир Путин 2011 йилда — Қримни эгаллашидан уч йил олдин Борис Елсин билан тузилган келишувга рози эмаслигини айтган. У шундай деган:
“Мен бунга қўшилмайман, буни қўллаб-қувватламайман ва ўзимни бу келишувга алоқадор деб ҳисобламайман”.
“Ўша кундан бошлаб мен Россиянинг Украинага бостириб кириши фақат вақт масаласи эканини англадим”, — деган Клинтон.
Гап Будапешт меморандуми ҳақида кетмоқда, унга кўра Россия, АҚШ ва Буюк Британия Украинанинг ҳудудий яхлитлигини тан олади. Москва Лондон ва Вашингтон билан биргаликда Украина ядровий арсеналини йўқ қилиш эвазига Киев хавфсизлигини кафолатлайди.
Ҳужжат 1994 йилда Борис Елсин, Билл Клинтон, Украина президенти Леонид Кучма ва Буюк Британия бош вазири Жон Мейжор томонидан имзоланган.
Клинтоннинг рафиқаси, АҚШ собиқ давлат котиби Ҳиллари Клинтоннинг айтишича, Украина урушни тўхтатиши учун ё Россияни мағлуб этиши, ёки ҳеч бўлмаганда мамлакат шарқида бой берилган ҳудудларни қайтариши керак.
“Агар биз қўллаб-қувватлаётган украиналиклар етарли таъсир кучига эга бўлмаганида, мен ҳеч қандай шароитда Путинга музокаралар давомида ишонмасдим”, — деди Клинтон.
Клинтонлар Ғарбни Украинани қўллаб-қувватлашни кучайтиришга чақирди. Агар тегишли қурол ва ўқ-дорилар билан таъминланса, Киев ғалаба қозониши мумкинлиги таъкидланди. Уларнинг фикрича, Украинани қўллаб-қувватлашдан бош тортиш нафақат Путинга, балки Хитой етакчиси Си Цзиньпинга ҳам жасорат бахш этади.