АҚШда қизамиқ билан касалланиш сони 33 йиллик рекордни янгилади. Бу ҳақда BBC хабар берди.
Мамлакатда 4 июль ҳолатига кўра, 1 300 га яқин кишида қизамиқ инфекцияси аниқланган. Жон Хопкинс университети томонидан эълон қилинган маълумотлар ўта юқумли касалликнинг тарқалиши давом этаётганини кўрсатган. Бир вақтлар бу инфекциянинг мамлакатда “йўқ қилиниши” тахмин қилинганди.
Қизамиқ билан касалланиш ҳолатлари 2025 йил давомида 38 штат ва Колумбия округида қайд этилган. Инфекциядан камида 3 киши вафот этган, яна 155 киши шифохонада даволанмоқда. Касалланганларнинг 92 фоизи эмланмаган ёки эмланганлик ҳолати номаълум бўлган одамларда қайд этилган. Энг кўп зарар кўрган штат Техас бўлиб, ҳудудда 700 дан ортиқ касалланиш ҳолати аниқланган. Шу каби яна ўнлаб ҳолатлар Канзас ва Нью Мексико штатларида ҳам кузатилган.
Соғлиқни сақлаш идораларига кўра, қизамиқ асосан эмлаш даражаси паст бўлган ҳудудларда, масалан, замонавий тиббиётдан воз кечган Техасдаги меннонит жамоаларида тарқалган. Касаллик АҚШ ва бошқа мамлакатларда сўнгги йилларда вакцинага қарши “салбий кайфият” кучайгани сабабли ортмоқда.
Соғлиқни сақлаш вазири Роберт Кеннеди аввалроқ болаларни эмлаш ҳақида нотўғри маълумот тарқатганди. Кейинчалик у қизамиқ, паротит ва қизилчага қарши вакциналарни тарғиб қилишга ўтган. Унга кўра, вакцина “қизамиқ тарқалишининг олдини олишнинг энг самарали усули” саналади.
АҚШда қизамиқ билан касалланиш 1990 йилда ҳам энг юқори кўрсаткичга етганди. Ўшанда 28 мингга яқин киши инфекцияни юқтирган. Эмлашнинг юқори даражаси ва эпидемияга қарши тезкор ҳаракатлар туфайли касалланиш сони 2000 йилларда 90 тадан камайиб кетган.
Инфекция тарқалиши ҳолатлари 2014 ва 2019 йилда бир оз кўпайишни бошлаган. Ҳозирда эса бутун АҚШ бўйлаб 1 277 та кишида касаллик кузатилган. Экспертларнинг айтишича, агар қизамиқнинг тарқалиши ҳозирги суръатда 12 ойдан ортиқ давом этса, АҚШ қизамиқни йўқ қилиш имкониятини йўқотади.
Буюк Британияда ҳам қизамиқ кенг тарқалмоқда. Мамлакатда 2024 йили қарийб 3 минг кишида инфекция аниқланган. Январь ойида эса мамлакатда 529 та киши касалланган. Канадада ҳозиргача 3000 дан ортиқ ҳолат ҳақида хабар берилган. Касалланиш ҳолатларининг асосий қисми Онтарио ва Алберта провинцияларига тўғри келади.
Изоҳ (0)