Қирғизистонда қизамиқ билан боғлиқ вазият мураккаблашди, мактаб ўқувчилари ва боғча тарбияланувчилари ўртасида касалланиш ҳолатлари кўпайди. Бу ҳақда мамлакат Соғлиқни сақлаш вазирлигига таяниб, “AKIpress” хабар берди.
Вакцина олмаган болаларга касаллик юқаётгани таъкидланди. 2023 йил бошидан буён 3289 киши қизамиққа чалинган бўлиб, уларнинг аксарияти 4 ёшгача бўлган болалардир.
Соғлиқни сақлаш вазирлигининг маълум қилишича, юқумли касалликлар аниқланган мактаб ва боғчаларда карантин эълон қилинган. Қизамиққа қарши қўшимча эмлаш кампанияси давом этмоқда. Вазирлик ота-оналардан фарзандларини ўз вақтида эмлашни сўраган.
Касаллик юқишини тўхтатиш учун эмлаш қамрови 95 фоиздан ошиши керак. Қизамиқ ва қизилчага қарши қўшимча эмлаш кампанияси доирасида ҳозирги кунга қадар 450 мингдан ортиқ бола эмланган, бу 76 фоизни ташкил этади.
Изоҳ (0)